Июнĕн 1-мĕшĕнче Чăваш Республикинче «Аслисем — ачасене» ыркăмăллăх акцийĕ старт илнĕ. Вăл «Ачалăх ячĕпе, ачалăхшăн» ыркăмăллăх марафонĕн пайĕ шутланать, ЧР Вĕренÿпе çамрăксен политикин министерстви, ЧР хĕрарăмсен Союзĕ, «Раççей ача-пăча фончĕн» регионти уйрăмĕ йĕркеленипе иртет.
Вăрмар муниципаллă округĕн территорийĕнче çак ыркăмăллăх акцийĕ 2023 çулхи июнĕн 1-мĕшĕнчен пуçласа октябрĕн 1-мĕшĕччен пырать. Акцие ирттерессипе тĕп мероприятисен планне тата йĕркелÿ комитечĕн йышне палăртнă.
Акци шайĕнче пухăннă укçа-тенкĕпе Вăрмар муниципаллă округĕнчи вĕрентÿ организацийĕсенче пĕлÿ илекенсем — «Родные просторы», «Туризм и краеведение» кружок пĕрлешĕвĕсене çÿрекенсем валли туристсен слетне хутшăнма тата турист слечĕсем ирттерме хатĕр-хĕтĕр туянма усă курĕç. Акцине предприятисем, организацисем, депутатсем, çамрăксен пĕрлешĕвĕсем, волонтер отрячĕсем тата ыттисем те хутшăнма пултараççĕ.
Укçа-тенкĕ «Фонд АРУНА историко-культурологических исследований имени суварского князя Вырак» коммерциллĕ мар организацин счечĕ çине куçать. Планпа палăртнă тăрăх, 100 000 тенкĕ пуçтармалла, июнĕн 6-мĕшĕ тĕлне 50 125 тенкĕ пухăннă.
Надежда ИВАНОВА, Вăрмар муниципаллă округĕн администрацийĕн вĕрентÿпе çамрăксен политикин пайĕн начальникĕн заместителĕ
