Вăрмар поселокĕн центрĕнче ĕç шавĕ кĕрлет — кунта тĕп площаде хăтлăх кÿрессипе ĕçсем пыраççĕ. Вĕсене икĕ тапхăрпа пурнăçлама палăртнă.
Çĕннине тăвиччен киввине ватмалла, çавăнпа паянхи кун тĕлне площадьре çутăпа тивĕçтерекен юпасене, бордюрсене кăларса илсе кайнă, йывăçсемпе тĕмсене касса территорине тасатнă. Малалла 2800 тăваткал метр тăваткалланă чул — брусчатка сарма палăртаççĕ. Çапла пĕлтерчĕ подрядчикăн — «Гарант» тулли мар яваплă обществăн представителĕ Александр Краюшкин. Хальхи вăхăтра 6 çын ĕçлет кунта.
Тĕп площаде хăтлăх кÿрес проекта «Пурăнмалли çурт-йĕр тата хула хутлăхĕ» наци проекчĕн «Хăтлă хула хутлăхне тăвасси» федераллă программи шайĕнче рейтинглă сасăлав ирттерсе суйланă. Обществăлла территорине хăтлăх кÿме 5,69 млн тенкĕ уйăрнă. Контрактпа килĕшÿллĕн площадьре тăваткалланă чул сармалла, ача-пăча площадки тата канмалли площадка тумалла, саксем, çутăпа тивĕçтерекен хунарсем вырнаçтармалла, территорине ешĕллетмелле.
Ирина ДАНИЛОВА
