Иртнĕ эрнере тараватлă Чăваш Ен çĕрĕ çинче, Шупашкар хулинче, «маунтинбайк-эстафета» дисциплинăра Раççей шайĕнчи чемпионат тата мала тухассишĕн ăмăртусем пулнă.
Раççейри 8 регионтан килнĕ спортсменсене В.Ярды ячĕллĕ Олимп резервĕсен 7-мĕш номерлĕ спорт шкулĕ йышăннă. Старта Мускав, Санкт-Петербург, Челябинск, Свердловск, Мускав облаçĕсенчи, Удмурт, Чăваш Ен, Донецк Халăх республикисенчи эстафета командисем хутшăннă. Августăн 17-мĕшĕнче арçынсемпе хĕрарăмсен командисем хушшинче иртнĕ эстафетăра Санкт—Петербург хулинчи «Олимпийские надежды» спорт шкулĕн воспитанникĕсем пĕрремĕш вырăн йышăннă. Палăртма кăмăллă, команда йышĕнче пирĕн ентеш, Кавал ялĕнче çуралса ÿснĕ, А.Ф.Федоров ячĕллĕ ачасемпе çамрăксен Вăрмарти спорт шкулĕн воспитанникĕ Артем Горшков та пулнă. Команда йышĕнче çĕнтернĕ ятпа спортсменпа, унăн тренерĕсемпе Вăрмар муниципаллă округĕн администрацийĕн пуçлăхĕ В.Шигильдеев, унăн заместителĕ — организаципе контроль тата аналитика ĕçĕн пайĕн начальникĕ Н.Павлов, А.Ф.Федоров ячĕллĕ ачасемпе çамрăксен Вăрмарти спорт шкулĕн директорĕ С.Архипов, ашшĕ В.Горшков Шупашкарта тĕлпулу ирттернĕ, çитĕнÿ тунă ятпа саламланă.
Августăн 20-мĕшĕнче иртнĕ Раççей Кубокĕнче Пинер ялĕнче çуралса ÿснĕ, Санкт—Петербург хулинчи «Олимпийские надежды» спорт шкулĕн воспитанникĕ Руслан Боредский 2-мĕш вырăн, Кавал ялĕнчи Артем Горшков 3-мĕш вырăн йышăннă. Çавăн пекех ăмăртура А.Ф.Федоров ячĕллĕ ачасемпе çамрăксен Вăрмарти спорт шкулĕн воспитанникĕсем — Вăрмарти Алексей Анисимовпа Арапуçĕнчи Даниил Карпов та хутшăннă. Алексей Раççей спорт мастерĕ 8-мĕш вырăн, Даниил 17-мĕш вырăн йышăннă. Иккĕшĕ те вĕсем Шупашкарти олимп резервĕсен училищинче вĕренеççĕ.
Эвелина МИХАЙЛОВА хатĕрленĕ.
