Çĕрпÿ округĕнче Пĕтĕм тĕнчери ваттисен кунĕ ячĕпе «кĕмĕл» волонтерсен «Кĕмĕл чун» ятпа форум иртнĕ.
Мероприятие ЧР Пуçлăхĕ Олег Николаев, Ĕçпе социаллă хÿтлĕх министрĕ Алена Елизарова, Çĕрпÿ округĕн пуçлăхĕ Алексей Иванов, ЧР Патшалăх Канашĕн Председателĕн заместителĕ Виктор Горбунов, Раççей Федерацийĕн Социаллă Фондăн Чăваш Республикинчи уйрăмĕн управляющийĕ Валерий Николаев тата регионти 300 ытла волонтер хутшăннă.
Тикаш ял тăрăхĕнчен ятарлă çар операцине хутшăнакан салтаксен ашшĕ-амăшĕсем те хутшăннă çак форума. Мобилизаци йĕркипе çар операцине лекнĕ салтакăн амăшĕ Ева Федоровна Иванова мастер-класс кăтартнă, хăй аллипе салтаксем валли çыхнă ăшă япаласемпе паллаштарнă.
«Кĕмĕл» волонтерсем тăтăшах гуманитари пулăшăвĕ кÿрсе пулăшаççĕ, утиялсем, минтерсем, ăшă япаласем çĕлеççĕ. Кашниех çак пархатарлă ĕçе хутшăнса çын пурнăçне упраса хăварма, çĕнтерĕве çывхартма пулăшать.
