Вĕрентекен кунне халалласа Вăрмар муниципаллă округĕнче савăнăçлă мероприяти иртрĕ. Капăр тумланнă, савăнăçлă пит-куçлă педагогсем хăйсен професси уявне паллă тума Вăрмарти Культура çуртĕнче пухăнчĕç.
Лăк тулли залра савăнăçлă та хумхануллă лару-тăру хуçаланчĕ. Округри вĕрентÿ учрежденийĕсен руководителĕсемпе вĕрентекенĕсене, педагогика ĕçченĕсене, ветерансене уяв ячĕпе Вăрмар муниципаллă округĕн пуçлăхĕ Василий Шигильдеев, ЧР Патшалăх Канашĕн депутачĕ Юрий Зорин, Вăрмар муниципаллă округĕн депутачĕсен Пухăвĕн председателĕ Юрий Иванов, Вăрмар муниципаллă округĕн администрацийĕн пуçлăхĕн социаллă ыйтусемпе ĕçлекен заместителĕн — вĕрентÿпе çамрăксен политикин пайĕн начальникĕн тивĕçĕсене пурнăçлакан Виктор Павлов, РФ халăх вĕрентĕвĕпе ăслăлăх ĕçченĕсен Вăрмар районĕнчи профсоюз организацийĕн председателĕ Елена Николаева, Тихвински Турамăш турăшĕн Мăнçырмари чиркĕвĕн настоятелĕ Леонид Ермолаев протоиерей, Вăрмарсен Шупашкарти ентешлĕхĕн президенчĕ Иван Аверьянов саламларĕç. Учитель ачасене пĕлÿ тĕнчипе паллаштарнипе пĕрлех пурăнма та вĕрентнине, вĕренекенсемшĕн хăй вăхăтне те, чун-чĕре ăшшине те шеллеменнине, вĕсене валли пурнăç сукмакĕпе çирĕп утăмсем тума çул уçса панине палăртса ĕçре ăнăçу сунчĕç, пархатарлă ĕçĕ-хĕлĕшĕн тав турĕç. Халĕ ĕçлекен учительсемпе танах педагогика ĕçĕн ветеранĕсем те ăшă саламлă сăмахсене тивĕçрĕç.
Йăлана кĕнĕ йĕркепе професси уявĕсенче хăйсен ĕçĕнче палăрнисене чыслаççĕ. Хальхинче те çаплах пулчĕ, вĕрентÿ тытăмĕнче тÿрĕ кăмăлпа вăй хурса пысăк çитĕнÿсем тунăшăн чи-чи пултаруллă вĕрентекенсене тĕрлĕ шайри наградăсем пачĕç.
Акă, Пысăк Енккассинчи вăтам шкулти музыка вĕрентекенне Татьяна Гавриловăна, Г.Е. Егоров ячĕллĕ Вăрмарти вăтам шкулта пуçламăш классене вĕрентекен Надежда Максимовăна, Чулкасри тĕп шкулти физкультура вĕрентекенне Вячеслав Паденькова, Кивĕ Вăрмарти вăтам шкулта вырăс чĕлхипе литературине вĕрентекен Маргарита Якимовăна РФ Çутĕç министерствин Хисеп грамотисемпе наградăларĕç /ÿкерчĕк çинче\.
Пысăк Енккассинчи вăтам шкулти математика вĕрентекенне Татьяна Русаковăна, Г.Е. Егоров ячĕллĕ Вăрмарти вăтам шкулти пуçламăш классен вĕрентекенне Ираида Савушкинăна, В.Д. Николаев ячĕллĕ Мăнçырмари вăтам шкулти автобус водительне Николай Гурьева ЧР Вĕрентÿ министерствин Хисеп грамотисемпе чысларĕç.
Чупайри тĕп шкулта биологипе хими предмечĕсене вĕрентекен Лена Григорьева, Шăхальти тĕп шкулта биологипе хими предмечĕсене вĕрентекен Валентина Иванова, В.Д. Николаев ячĕллĕ Мăнçырмари вăтам шкулти библиотекарь Ираида Игнатьева, Энĕшпуçри вăтам шкулти музыка вĕрентекенĕ Наталия Игнатьева, Кĕтеснерти тĕп шкулта акăлчан чĕлхине вĕрентекен Алевтина Кузьмина Вăрмар муниципаллă округĕн администрацийĕн Хисеп грамотисене тивĕçрĕç.
Çавăн пекех педагогсене ытти шайри Хисеп грамотисемпе тата Тав çырăвĕсемпе те наградăларĕç. Вăрмарти ачасен пултарулăх çурчĕ çумĕнчи «Туризм тата таврапĕлÿ» кружока çÿрекенсене «Аслисем — ачасене» ыркăмăллăх акцийĕ вăхăтĕнче пухăннă укçа-тенкĕпе усă курма ирĕк паракан сертификат пачĕç.
Мероприяти малалла муниципалитет шайĕнчи «Эпĕ хĕрарăм-педагог» конкурс иртнипе тăсăлчĕ. Ăна Педагог тата наставник çулталăкне халалланă. Конкурса хутшăнакансем хăйсен пултарулăхĕпе паллаштарнă. Çĕнтерÿçĕсене тĕрлĕ номинацисенче палăртса чысланă.
Уяв тăршшĕпех пухăннисене Г.Е. Егоров ячĕллĕ Вăрмарти тата Пысăк Енккассинчи шкулсен вĕренекенĕсем, Вăрмарти ачасен искусство шкулĕн, «Степ» ташă студийĕн воспитанникĕсем юрă-ташăпа савăнтарчĕç.
Ирина ДАНИЛОВА
