2023 çулхи ноябрĕн 1-30-мĕшĕсенче Чăваш Енре шкул театрĕсен «АСАМ» фестивалĕн республикăри тапхăрĕ иртĕ.
Телейлĕ ачалăх çулталăкне халалланă мероприятине пуçараканĕ — РФ Федераллă Пухăвĕн Патшалăх Думин депутачĕ Алла Салаева, йĕркелекенĕсем — ЧР Вĕрентÿ тата Культура министерствисем, талантлă ачасемпе çамрăксен «Эткер» центрĕ, Чăваш патшалăх культурăпа искусство институчĕ.
Республикăри тапхăра хăйсен муниципалитечĕсенче çĕнтернĕ шкул театрсем хутшăнĕç. Çĕнтерÿçĕсене тĕрлĕ номинацисенче палăртĕç, вĕсем сертификатсемпе хаклă парнесене тивĕçĕç. Чи пултаруллă ачасен хăйсен спектаклĕсемпе регионăн чи паллă театрĕсен сцени çине тухма, республика тăрăх гастрольсене çÿреме май пулĕ.
Аса илтеретпĕр, Вăрмар муниципаллă округĕнче Чулкасри пĕтĕмĕшле пĕлÿ паракан тĕп шкулăн театрĕ çĕнтерÿçĕ пулнă, республикăри тапхăра хутшăнма тивĕçнĕ. Планпа килĕшÿллĕн, пирĕн çамрăк ентешĕмĕрсем ноябрĕн 13-мĕшĕнче Чăваш патшалăх пуканесен театрĕн сцени çине тухса жюри членĕсене «Мăнкун сăваплă кун» театрализациленĕ кăтартупа паллаштарĕç.
