ЧР Шалти ĕçсен министерствин пресс-служби пĕлтернĕ тăрăх, Чăваш Енре полицейскисем икĕ гражданина наркотикпе тытса чарнă. Çак кунсенче Шупашкарта çул-йĕр патрулĕн службин экипажĕ тĕлне полицейскисене курсан çав тери хумханса кайнă арçын пулнă. Ахальтен хумханман вăл, арçын çумĕнче 15 грамм наркотик тупнă. Унччен маларах Çĕнĕ Шупашкар хулинче право хуралĕн службин сотрудникĕ çак хуларах пурăнакан, унччен судпа айăпланнă пулнă 33 çулхи гражданина тытса чарнă. Полицейски ун çумĕнче шурăрах тĕслĕ порошоклă пысăках мар тĕрке тупнă. Экспертиза палăртнă тăрăх, ку вăл 0,29 грамм мефедрон пулнă. Арçын тĕлĕшпе уголовлă ĕç пуçарнă.