Наркомани чирĕ хăвăрт сарăлса пырать. Малтанхи аташу чире куçнине сиссе те юлма май çук. Унтан вара тавăру сехечĕ çаврăнса çитет: çын халсăрланать, унăн ыйхă килмест, апат анмасть, вăл начарланса каять. Хăрнă шăлсем, çÿç тăкăнни, шаклаланни, сарă-тĕксĕм ÿт-тир, пит-куç çамрăклах пĕркеленсе ларни - наркоманăн типлă сăн-сăпачĕ. Наркотик серепине лекнĕ çыннăн психики улшăнать. Вăл кăнттамланать, хăйне çеç юратма пуçлать. Тус-юлташĕнчен, тăванĕсенчен сивĕнет. Вĕсемпе калаçу пуçарма йывăр. Ун пек çынсен пуçĕнче кирек епле пулсан та наркотик тупас шухăш çеç, çапла вĕсем хăйсем сисмесĕрех преступлени çулĕ çине тăраççĕ.
Чир вĕçĕ - инвалид пулса тăни тата пурнăçран çамрăклах уйрăлса кайни. Çакă организм ырханланса çитнипе çеç çыхăнман, наркомансем хăйсен пурнăçĕ çине алă хураççĕ е наркотик нумай йышăннипе вилеççĕ.
