Раççейре вĕрентÿ тытăмне аталантарассипе хальхи вăхăтра тĕллевлĕ ĕçлеççĕ. Умри задачăсене пурнăçлас ĕçре «Вĕрентÿ» наци проекчĕн пĕлтерĕшĕ пысăк. Вăл РФ Президенчĕ Владимир Путин палăртнă çĕршывăн наци тĕллевне — çамрăк талантсене пурнăçра хăйсен вырăнне тупма тата аталанма майсем туса парассине — пурнăçлама пулăшать.
2023 çул вĕçĕччен «Вĕрентÿ» наци проекчĕ шутне «Çамрăк профессионалсем /Профессиллĕ вĕрентĕвĕн конкурентлăхне ÿстересси/» федераллă проект шайĕнче профессиллĕ вăтам вĕрентĕвĕн тытăмне аталантарассипе çыхăннă мероприятисен комплексĕ кĕнĕ. Вăл «Тивĕçлĕ, эффективлă ĕç тата ăнăçлă предпринимательлĕх» наци тĕллевне пурнăçлама хăйĕн тÿпине хывнă. 2022 çултан профессиллĕ вăтам вĕрентĕвĕн тытăмне аталантарассипе çыхăннă мероприятисем наци проекчĕ шутне кĕмен «Профессионалитет» федераллă проект шайĕнче пурнăçланаççĕ.
Хальхи вăхăтра çĕршывра «Профессионалитет» федераллă проектăн колледжĕсенче йышăну кампанийĕ пырать. Вăл июнĕн 20-мĕшĕнче старт илнĕ. Проект шайĕнче çамрăксене хальхи йышши оборудованипе тивĕçтернĕ 1200 ытла колледж йышăнĕ. Студентсем ĕç паракансем хатĕрлеме хутшăннă вĕрентÿ программине ăса хывĕç, хальхи саманара кирлĕ специальноçсене алла илĕç, производствăра ĕçлесе опыт пухĕç, çавăн пекех вĕсене çĕршывăн ертсе пыракан компанийĕсене ĕçе вырнаçма пулăшĕç.
Проект аталансах пырать. 2026 çул тĕлне унта çĕршыври мĕнпур регион хутшăнĕ, 2030 çул тĕлне вара «Профессионалитет» проекта колледжсен 100 процентне явăçтарĕç.
Паянхи кун тĕлне Чăваш Республикинчи ятарлă вăтам пĕлÿ паракан 7 вĕрентÿ заведенийĕ проекта хутшăнать. Вĕсем туризм тата пулăшусен сфери, клиникăпа профилактика медицини, машинăсем тăвасси, хими отраслĕ, ял хуçалăхĕ, педагогика, топливăпа энергетика комплексĕ енĕпе ĕçлеççĕ. «Профессионалитет» федераллă проекта хутшăнакан регионсенчи колледжсем тата компанисем пирки тĕплĕнрех япроф.рф сайтра пĕлме пулать.
Палăртса хăвармалла, патшалăхăн пĕрлехи порталĕ урлă кирек миçе вĕрентÿ заведенине те заявлени пама, ун çумне документсем хума пулать. Кăçалхи çĕнĕлĕх — сервиспа ют çĕршыв çыннисем те усă курма пултараççĕ.
Йышăну кампанийĕ творчествăллă специальноçсемшĕн августăн 10-мĕшĕччен, ыттисемшĕн августăн 15-мĕшĕччен пырĕ. Енчен те вырăнсем юлсан хăш-пĕр вĕрентÿ заведенийĕсем йышăну кампанине ноябрĕн 25-мĕшĕччен тăсма пултараççĕ.
Ирина ДАНИЛОВА хатĕрленĕ
