Раççей Президенчĕн Владимир Путинăн Хушăвĕпе 2019 çулта ытти наци проекчĕсемпе пĕрлех «Экологи» наци проектне те хута янă. Унăн ĕçĕ-хĕлĕ каяшсене вырнаçтарассипе, атмосферăна тухакан сиенлĕ япаласен калăпăшне чакарассипе, шывлă вырăнсене тасатассипе, вăрмансем лартса ÿстерессипе, хăйне евĕрлĕ флорăпа фаунăна упраса хăварассипе çыхăннă.
«Экологи» наци проекчĕ шайĕнче Чăваш Республикинче «Атăла сыватасси», «Вăрмансене упраса хăварасси», «Таса çĕршыв», «Коммуналлă хытă каяшсене вырнаçтарас ĕçĕн комплекслă тытăмĕ», «Сайра шыв объекчĕсене упраса хăварасси», «Таса шыв» проектсем пурнăçланаççĕ.
«Вăрмансене упраса хăварасси» федераллă проект пурнăçланнă май çулсерен Чăваш Республикинче вăрман пушарĕсемпе кĕрешмелли техникăпа оборудовани паркĕ çĕнелет. Сăмахран, иртнĕ кунсенче Шăмăршă лесничествине йывăр тиевлĕ автомашина панă. Вăрман пушарĕсене сÿнтернĕ чухне çакăн пек автомашинăсемпе çынсене те, оборудовани те турттараççĕ. Вĕсене ГЛОНАСС тытăмпа тата ытти хатĕрсемпе те тивĕçтернĕ. «Вăрмансене упраса хăварасси» проект ĕçлеме тытăннăранпа Чăваш Енри лесничествăсене 170 млн тенкĕлĕх 538 единица техника тата оборудовани панă. 2024 çул вĕçленнĕ тĕле республикăна вăрман пушарĕсемпе кĕрешмелли техникăпа 100% таран тивĕçтерме планланă», — пĕлтерет ЧР Çутçанталăк ресурсĕсемпе экологи министрĕ Эмир Бедертдинов.
Аса илме: хальхи вăхăтра Чăваш Республикинче вут-çулăма хирĕç кĕрешмелли тапхăр пырать, çавăнпа профилактика тĕллевĕпе тата пушар хăрушсăрлăхĕн правилисене пăснă тĕслĕхсемпе кĕрешме вăрмансенче патруль ĕçне йĕркеленĕ, çав шутра Канаш лесничествин территорийĕнче те. Ятарлă режим вăхăтĕнче вăрмансемпе вĕсен çумĕнчи территорисенче çÿп-çап тата хыт-хура çунтарма, кăвайт чĕртме, кăвар çинче апат хатĕрлеме, вăрмансем е ял хуçалăх пĕлтерĕшлĕ çĕрсем çумĕнче типĕ курăка çунтарма чарнă. Пушар хăрушсăрлăхĕн требованийĕсене пăсакансене пысăк штраф кĕтет.
Йывăçсем лартса хăварни те вăрмансене упраса хăварас тĕллеве пурнăçлама пулăшать. Вăрмар округĕнче ăна пысăк тимлĕх уйăраççĕ. Акă, 2023 çулта, Вăрмар муниципаллă округĕн администрацийĕн АПК аталанăвĕпе экологи пайĕнчен пĕлтернĕ тăрăх, пирĕн округра 1300 тĕп çамрăк хунав /чăрăш, хыр, çăка, кăвак чăрăш\ лартса хăварнă. Ырă ĕçе 144 ытла çын хутшăннă.
Ирина ДАНИЛОВА
