«Экологи» наци проекчĕн «Коммуналлă хытă каяшсене вырнаçтарас ĕçĕн комплекслă тытăмĕ» федераллă проекчĕн тĕллевĕсене пурнăçлама, çавăн пекех Экологи культурин тата çутçанталăкпа перекетлĕ усă курмалли çулталăк шайĕнче ЧР Çутçанталăк ресурсĕсен тата экологи министерстви батарейкăсем пуçтарас ĕçе йĕркеленĕ.
Чăваш Республикинче пурăнакансем батарейкăсем пуçтарас ĕçе лесничествăсем урлă та хутшăнма пултараççĕ. Акă, Йĕпреç лесничествин Буинскри участокĕнче 19 литрлă савăта батарейкăсемпе тулли тултарнă. Халĕ вĕсем çутçанталăка сиен кÿреймĕç, вĕсене утилизацилеме Ярославль хулинчи «Наци экологи компанийĕ» тулли мар яваплă обществăна ăсатĕç. ЧР Çутçанталăк ресурсĕсен тата экологи министерствин «Экологин ăслăлăхпа тĕпчев институчĕ» автономлă учрежденийĕ асăннă организаципе килĕшÿ тунă.
Батарейкăсене лесничествăсенче те пуçтараççĕ. Çавăн пекех министерствăна çак адреспа пырса пама пулать: Шупашкар хули, Ленинград урамĕ, 33-мĕш çурт.
Вăрмар округĕнче те батарейкăсем пуçтарас ĕçе куçран вĕçертмеççĕ. Вăрмар муниципаллă округĕн администрацийĕн 1-мĕш хутĕнче те, «Сбербанкăн» Вăрмар поселокĕнчи уйрăмĕнче те вĕсене пуçтарма пластик савăтсем лартнă.
Ирина ДАНИЛОВА
