ЧР Шалти ĕçсен министерстви Вăтам Азире çуралса ÿснĕ арçыннăн Раççей гражданлăхне пĕтерме йышăннă.
Сăлтавĕ — вăл экстремизпа çыхăннă преступлени туни. 2023 çулта Шупашкарти Мускав районĕн сучĕ Федерацин хăрушсăрлăх службин республикăри управленийĕн материалĕсене тĕпе хурса ăна Уголовлă кодексăн 280 статйин 2-мĕш пайĕпе /интернет сечĕпе усă курса экстремистла ĕçсем тума халăх умĕнче чĕнни\ айăпланă, условнăй майпа 2 çуллăха ирĕксĕр хăварнă. Полици унăн Раççей гражданинĕн паспортне туртса илес ĕçе йĕркеленĕ — вăл вăйсăр ĕнтĕ. Çавăн пекех ШĔМ вăл чикĕ леш енне тухса каяссине тĕрĕслесе тăрассине хăйĕн çине илнĕ. Палăртни вырăнлă: пĕлтĕрхи октябрь уйăхĕнче 28.04.23 ç. йышăннă 138-ФЗ ; «Раççей гражданлăхĕ çинчен» саккун вăя кĕнĕ. Унта гражданлăха пĕтермелли институт тĕлĕшпе çĕнĕлĕхсем пур. Саккунăн 24 статйипе килĕшÿллĕн çынна арлăх тĕлĕшĕнчен тĕкĕнме юраманнипе, наркотиксен саккунсăр çаврăнăшĕпе, терроризмпа тата экстремизмпа çыхăннă преступленисем гражданлăха пĕтермелли сăлтав пулса тăраççĕ.
