Шыв-шур çын пурнăçне пĕрре те хĕрхенмест. Çакăн пек чухне хамăрăн асăрхануллă пулмалла пек те, анчах...
Август уйăхĕ çитрĕ пулсан та ентешсем шыва кĕме чарăнман-ха. Халăх сăнавне итлекенсем вара Илен кунĕ хыççăн шыва кĕме юраманнине калаççĕ. Чăваш Енри МЧС сайтĕнче пĕлтернĕ тăрăх, иртнĕ эрнере республикăри шыв-шурта 2 çын путса вилнĕ. Пĕр инкекĕ август уйăхĕн 4-мĕшĕнче пулнă. Шупашкар округĕнчи Етĕрнекасси ялĕ çывăхĕнчи пĕвере 47 çулти арçыннăн чĕри тапма чарăннă. Унăн виллине çăлавçăсем илсе тухнă. Çу пуçланнăранпа республикăри шыв-шурта 25 çын пурнăçĕ татăлнă, вĕсенчен виççĕшĕн — ачасен.
Çавăнпа инкек сиксе ан тухтăр тесен хăрушсăрлăх правилисене пăхăнмалла. Ятарласа хатĕрленĕ вырăнта кăна ишмелле, буексенчен шаларах иртмелле мар, эрех-сăра сыпнă хыççăн шыва кĕме пачах юрамасть, аслисен ачасене сăнасах тăмалла, куçран вĕçертмелле мар. Пĕлмен çĕрте шыва кĕме шутларăр пулсан малтан шыв тарăнăшне, çыран хĕрринче тата шывра кĕленче ванчăкĕсем, çÿп-çап выртманнине тĕрĕслемелле.
