Вăрмар районĕнчи потребительсен кооперацийĕ кирек мĕнле саманара та ура çинче çирĕп тăрса малаллах аталанать, пурнăç уттипе тан пырать. Çулсем иртеççĕ, анчах Вăрмар райповĕн авторитечĕ унчченхи пекех çирĕп, хисепĕ те халăх хушшинче иксĕлмест. Çынсен кăмăлне тивĕçтерессине мала хурса райпо тытăмĕнчи лавккасене, общество апатланăвĕн объекчĕсене юсасах тăраççĕ, нимĕнле конкуренцие пăхмасăрах çĕнĕ суту-илÿ объекчĕсене те хута яраççĕ.
Акă, Вăрмар поселокĕнче «КООПМаркет» лавкка уçăлнăранпа çулталăк та çитеймен-ха, анчах çак вăхăт хушшинче вăл Вăрмар округĕнче пурăнакансемшĕн юратнă вырăн пулса та тăнă. Çапла пулмасăр, çĕнĕ лавкка меллĕ вырăнта вырнаçнă, унăн строительствине хальхи самана ыйтнипе килĕшÿллĕн пурнăçланă, çĕнĕ йышши суту-илÿ оборудованийĕпе тата мĕнпур условисемпе тивĕçтернĕ, продукци ассортименчĕ те савăнтарать.
Хальхи вăхăтра Вăрмар райповĕн тепĕр лавккине реконструкцилессипе те ĕçлеççĕ. Ку вăл Вăрмар поселокĕн центрĕнче, автовокзал çумĕнче вырнаçнă пурте пĕлекен тата кăмăллакан «Заря». 2021 çулта кăна-ха кунта тĕп юсав ĕçĕсем пурнăçласа суту-илÿ лаптăкне пысăклатнăччĕ, çĕнĕ йышши суту-илÿ оборудованийĕ, сивĕтмĕшсем вырнаçтарнăччĕ. Паянхи кун лавкка çуртне юсаса çĕнетес, лаптăкне пысăклатас ĕç малалла пырать. Ĕçсене «Стимул-Строй» тулли мар яваплă общество пурнăçлать. Сăмаха май, «КООПМаркет» лавккан строительствине те асăннă организацинех шанса панă пулнă.
Тĕп юсав ĕçĕсем ирттерни лавккан тĕп тивĕçне — суту-илÿ ĕçне пурнăçлама чăрмантармаççĕ. «Заря» алăкĕсем туянакансем валли кашни кунах тараватлăн уçăлаççĕ. Хăçан кĕретĕн — яланах халăх йышлă кунта, касса умĕнче те çынсем черетленсе тăраççĕ. Паллах, ахальтен мар. Самообслуживани лавкки пысăк, таса, çутă, хăтлă пулнипе илĕртет, стеллажсем тĕрлĕ йышши таварпа туп-тулли. Чăвашпотребсоюзăн ытти лавккисенчи пекех, вырăнти — Чăваш Енри — производительсем туса кăларакан продукци ытларах кунта. Сăмахран, Етĕрнери аш-какай комбиначĕн кăлпассийĕпе аш-какай деликатесĕсем тата çурмафабрикатсем, «Кооператор» тулли мар яваплă обществăн алкогольсĕр пылак шывĕсем, Элĕкри улма-çырла комбиначĕн консервланă продукцийĕ, «АККОНД» акционерсен обществин канфечĕсем тата ытти те. Вăрмар райповĕн тытăмĕнчи «Общепит» тулли мар яваплă обществăн продукцийĕ пирки вара уйрăммăн каласа хăвармалла. «Общепитăн» пĕчĕк кукăлĕсемпе хуплăвĕсене туянма вăрмарсем «Заря» лавккана ир-ирех васкаççĕ. Лавкка заведующийĕ Наталья Дмитриевна Семенова та çакна çирĕплетрĕ. «Туянакансем «Общепит» продукцине питĕ кăмăллаççĕ, уншăн эпир савăнатпăр», — терĕ вăл.
Наталья Дмитриевна суту-илÿре мĕн çамрăкран вăй хурать, çав шутра 2008 çултанпа — райпо тытăмĕнче ĕçлет. Пысăк опытлă, тăрăшуллă заведующи лавкка ĕçĕ-хĕлне çирĕп алăпа тытса пырать. Анчах хăйне мухтанине юратмасть вăл, ĕç тухăçлăхĕ коллектив пĕр шухăшпа, пĕр тĕллевпе ĕçленинчен килнине палăртать. Заведующисĕр пуçне тата 5 çын ĕçлет кунта: Наталия Васильевна Казанова, Ольга Ивановна Корнилова, Зинаида Николаевна Антонова, Надежда Ивановна Дмитриева сутуçăсем тата Галина Николаевна Грачева тирпей-илем кĕртекен. «Эпир ĕçе пайласа тăмастпăр, пĕр-пĕрне пулăшса туслăн ĕçлетпĕр. Пирĕн хĕрсем хăйсен ĕçĕнче чăн-чăн ăстасем, вĕсем суту-илÿре çĕнĕ çынсем мар, вĕрентме кирлĕ мар вĕсене. Хăйсен тивĕçĕсене яваплăн пурнăçлаççĕ, туянакансемпе ырă кăмăлпа калаçаççĕ», — тет Наталья Дмитриевна.
Унăн сăмахĕсене Вăрмар райповĕн руководстви те çирĕплетрĕ, ахальтен мар «Заря» ĕçченĕсем тăрăшуллă пулнăшăн пĕрре кăна мар тĕрлĕ наградăсене тивĕçнĕ. Акă, Наталья Семеновăна Вăрмар райпо Канашĕн, Чăвашпотребсоюзăн, Вăрмар муниципаллă округĕн администрацийĕн Хисеп грамотисемпе, «Потребительсен кооперацине — 190 çул» медальпе чысланă, Чăвашпотребсоюзăн Хисеп хăми çинче пулма та тивĕçнĕ вăл. Наталия Казановăна тата Зинаида Антоновăна Вăрмар райпо Канашĕн, Чăвашпотребсоюзăн Хисеп грамотисемпе наградăланă. Ольга Корнилова — ЧР потребительсен кооперацийĕн ветеранĕ, «Потребительсен кооперацийĕнче 25 çул лайăх ĕçленĕшĕн» паллăна тивĕçнĕ.
Ирина ДАНИЛОВА
