«Цифра экономики» наци проекчĕн «Информаци инфратытăмĕ» регионти проекчĕ шайĕнче Чăваш Республикинче телекоммуникаци инфратытăмне анлăлатас ĕç малалла пырать.
2024 çулта 100-тен пуçласа 500-е таран çын пурăнакан пĕчĕк ялсенче базăллă икĕ çĕнĕ станци вырнаçтарĕç. Муркаш округĕнчи Ятман тата Куславкка округĕнчи Кармăш ялĕсенче пурăнакансем кĕçех хальхи йышши çыхăну пахалăхне хаклама пултарĕç. Контрактпа килĕшÿллĕн базăллă станцисене çулталăк вĕçлениччен вырнаçтармалла.
«Базăллă станцисене аякри пĕчĕк ялсенче вырнаçтарни — телекоммуникацисен аталанăвĕнчи малалла тунă утăм кăна мар. Ку вăл цифра танмарлăхне чакарма пулăшакан пысăк пĕлтерĕшлĕ социаллă проект. Пахалăхлă мобильлĕ çыхăну тата пысăк хăвăртлăхлă интернет вырăнти халăх валли çĕнĕ майсем уçса парать: инçетре ĕç тупма, патшалăх тата медицина пулăшăвĕсемпе усă курма, онлайн-пĕлÿ илме, çывăх çыннисемпе тата юлташĕсемпе çыхăну тытма пулăшать», — тет ЧР цифра аталанăвĕпе информаци политикин тата массăллă коммуникацисен министрĕ Михаил Степанов.
Палăртмалла, цифра танмарлăхне пĕтермелли федераллă проект пурнăçланнă май Чăваш Енре 100-тен пуçласа 500-е таран çын пурăнакан аякри тата пĕчĕк 375 ял халăхĕ хальхи йышши çыхăну пулăшăвĕсемпе усă курма пултарать ĕнтĕ. Социаллă пĕлтерĕшлĕ объектсене Интернетпа 100 проценчĕпех тивĕçтернĕ. Ку вăл «Цифра экономики» наци проекчĕн тĕллевĕсем ăнăçлă пурнăçланнине çирĕплетет.
Аса илер-ха, Вăрмар округĕнчи Анаткас ялĕнче те 2021 çулта цифра танмарлăхне пĕтермешкĕн пысăк хăвăртлăхлă Интернет çыхăнăвĕпе усă курма май паракан базăллă станци вырнаçтарнă. Унтанпа Анаткас халăхĕ Интернет ырлăхĕпе, мобильлĕ çыхăнупа пĕр чăрмавсăр усă курать. 2024 çулта Кавал ялĕнче пурăнакансене те пысăк хăвăртлăхлă Интернетпа тивĕçтернĕ. Халĕ кавалсем интернетра хăйсене кирлĕ информацие питĕ хăвăрт шыраса тупма, мессенджерсенче тата социаллă сетьсенче сăн ÿкерчĕксем тата видео вырнаçтарма, тăвансемпе видеоçыхăну мелĕпе калаçма пултараççĕ. Кавал ялĕнче шкул тата ун çумĕнче ача сачĕ, пĕтĕмĕшле практика врачĕн офисĕ, библиотека, культура çурчĕ ĕçлеççĕ. Пысăк хăвăртлăхлă мобильлĕ интернет вĕсене ĕçре пулăшса пырать.
Ирина ДАНИЛОВА хатĕрленĕ
