Августăн 21-мĕшĕнче Вăрмар округĕнче черетлĕ Пĕрлехи информаци кунĕ иртрĕ. Унăн темисем: вĕрентÿ организацийĕсем çĕнĕ вĕренÿ çулĕ валли мĕнле хатĕрленни; уйрăм çуртсенчи тата хваттерсенчи газ оборудованине техника енчен пăхса тăрасси тата хăрушсăрлăх нормисемпе килĕшÿллен усă курасси; нумай функциллĕ центр халăха кÿрекен пулăшусем. Ĕçлĕ ушкăнсем Чулкас, Мăнçырма, Кĕлкеш ял тăрăхĕсенче пулса халăхпа тĕл пулчĕç.
Информушкăн членĕсен ĕçне Кĕлкешре – Чăваш Республикин строительство, архитектура тата пурăнмалли çурт-йĕрпе комуналлă хуçалăх министрĕн пĕрремĕш заместителĕ Владимир Максимов тата Вăрмар муниципаллă округĕн пуçлăхĕ Василий Шигильдеев /сăн ÿкерчĕк çинче\, Мăнçырмара — Вăрмар муниципаллă округĕн администрацийĕн пуçлăхĕн заместителĕ — строительство тата çул-йĕр хуçалăхĕн пайĕн начальникĕ Наталия Иванова, Чулкасра – Вăрмар муниципаллă округĕн депутачĕсен Пухăвĕн председателĕ Юрий Иванов йĕркелесе пычĕç.
Чулкас ялĕнче тĕлпулу кунти пĕтĕмĕшле пĕлÿ паракан вăтам шкулта иртрĕ. Яваплă çынсене Чулкасри территори пайĕн начальникĕ Георгий Усков кĕтсе илчĕ. Калаçу вăхăтĕнче шкул çĕнĕ вĕренÿ çулне хатĕррине палăртрĕç, анчах татса паман хăш-пĕр ыйтусем те пур. Тĕслĕхрен, территори тавра хÿме тытса пĕтермелле, спорт площадкине хăтлăх кĕртес ĕçе малалла тăсмалла. Унсăр пуçне Вăрмар муниципаллă округĕн депутачĕсен Пухăвĕн депутачĕпе Леонид Павловпа чулкассене пăшăрхантаракан ыйтусене те — çул тăвасси, каçсерен урамсене çутăпа тивĕçтересси, час-часах шыв чарни — сÿтсе яврĕç.
Вăрмарти газ участокĕн мастерĕ Юрий Макаров газ счетчикĕсене вăхăтра улăштармаллине, котел ĕçне вăхăтра тĕрĕслеттерсе тăмаллине аса илтерчĕ. Ятарлă çар операцине хутшăнакансен çемйисем, ытти граждансем киле газ кĕртес тесен мĕнле çăмăллăхсемпе усă курма пултарнине ăнлантарчĕ. Раççей ял хуçалăх банкĕн Вăрмарти уйрăмĕн управляющийĕ Алевтина Максимова асаннă банк паракан пĕчĕк процентлă кредитсем пирки каласа пачĕ. Çынсен те ыйтусем сахал мар пулчĕç /сăн ÿкерчĕк çинче\, кашнин çине вĕсем тивĕçлĕ хурав илчĕç.
Информушкăн членĕсем пуçтарăннă халăха хăйсене ăшшăн йышăннăшăн тав турĕç, ял ыйтăвĕсене контроле илме сăмах пачĕç.
Ульяна СИМУШКИНА
