Кун пирки хăйĕн телеграм-каналĕнче ЧР Министрсен Кабинечĕн Председателĕн заместителĕ — ЧР Экономика аталанăвĕн тата пурлăх хутшăнăвĕсен министрĕ Дмитрий Краснов каласа панă.
Туристсем республикăри канмалли вырăнсенче чарăнса çĕр каçнин шучĕ 2024 çулхи пĕрремĕш çурçуллăхра 538 пине çитнĕ. Çав вăхăтрах Чăваш Енри гостиницăсенче тата кану базисенче чарăннă туристсен шучĕ 214 пин ытла пулнă. Çакă 2023 çулхи çак тапхăрпа танлаштарсан 1/3 хут нумайрах.
«Вăтамран илсен, Чăваш Енри отельсенче туристсем 2-3 талăка чарăнаççĕ. Ку вăл çулçÿревçĕсем çак кунсенче Чăваш Енре хăйсен укçи-тенкине хăварнине пĕлтерекен лайăх кăтарту: вĕсем кафесемпе ресторансене çÿреççĕ, лавккасенче сувенирсем, асăнмалăх япаласем туянаççĕ, экскурсисемшĕн тÿлеççĕ. Çак динамикăна малалла та ÿстерсе пырăпăр», — тенĕ Дмитрий Краснов.
Пĕрремĕш çурçуллăхри кăтартусене пĕтĕмлетнĕ май, республикăра 450 пине яхăн турист пулни паллă, çав шутра гостиницăсенче чарăннисем кăна мар, тĕслĕхрен, теплоходсемпе килнĕ туристсем те. Тĕплĕнрех çуллахи сезона пĕтĕмлетнĕ чухне калама пулĕ.
Палăртмалла, «Туризм тата тараватлăх индустрийĕ» наци проекчĕ шайĕнче Чăваш Республикинчи темиçе муниципалитетра — Улатăр, Шупашкар, Куславкка, Краснормейски, Канаш округĕсенче, çавăн пекех Атăл леш енче те — 6 глэмпинг хăпартаççĕ. Июлĕн 1-мĕшĕнчи даннăйсем тăрăх, глемпингсенче 33 номер хута янă. Строительство мĕнле пурнăçланнине ЧР Экономика аталанăвĕн тата пурлăх хутшăнăвĕсен министерствин ятарлă комиссийĕ тĕрĕслесе тăрать.
«Пирĕн тĕллев – Чăваш Ене килекен туристсен шутне 2030 çул тĕлне 1,5 млн çын таран ÿстересси. Вĕсенчен ытларахăшĕ республикăрах çĕр каçма юлни пысăк пĕлтерĕшлĕ», – пусăм туса каланă Дмитрий Краснов.
«Туризм тата тараватлăх индустрийĕ» наци проекчĕ Вăрмар округĕнче те ĕçлет. Сăмахран, округри шкул ачисем валли 4 тĕрлĕ туризм маршручĕ йĕркеленĕ. Унсăр пуçне пĕлтĕр «Шкулсенчи туризм маршручĕсем» муниципаллă проект пурнăçланнă. Çак маршрутсен объекчĕсенчен пĕри — Вăрмарти историпе таврапĕлÿ халăх музейĕ. Музейри экспозицисемпе Вăрмар округĕнчи шкул ачисем кăна мар, Тăвай округĕнчи, Тутар Республикинчи ялсенчи шкулсенче вĕренекенсем, Тутарстан турисчĕсем те паллашнă. Пĕлтĕр музейре 91 мероприяти иртнĕ, пĕтĕмпе кунта 4 433 çын пулса курнă.
Ульяна СИМУШКИНА
