Вăрмар округĕнче шкул театрĕсен «АСАМ» ятпа иртекен II-мĕш фестивалĕн муниципалитетри тапхăрĕ вĕçленчĕ. Фестивале кăçал Раççейри Çемье çулталăкне тата Чăваш Енри Экологи культурин тата çутçанталăкпа перекетлĕ усă курмалли çулталăка халалланă.
Аса илтеретпĕр: мероприяти Чăваш Республикинче РФ Федераллă Пухăвĕн Патшалăх Думин депутачĕн Алла Салаевăн пуçарăвĕпе 2023 çулта старт илнĕ. РФ Çутĕç министрĕ Сергей Кравцов хушнă тăрăх, 2024 çул тĕлне кашни шкулта хăйĕн театр пулмалла, мĕншĕн тесен шкул ачисене театр ĕçне явăçтарни талантлă ачасене тупса палăртма, вĕсене пултарулăхра çул уçса пама пулăшать. Унăн хушăвне тĕпе хурса Вăрмар округĕнчи шкулсенче те театрсем йĕркеленĕ.
Кăçал фестивалĕн муниципалитетри тапхăрне Вăрмар округĕнчи шкулсен çумĕнчи 14 театр хутшăннă. Жюри умне сцена çине тухса 150 ытла ача спектакльсенче вылянă. Каларăмăр ĕнтĕ, спектакльсене Раççейри Çемье çулталăкне тата Чăваш Енри Экологи культурин тата çутçанталăкпа перекетлĕ усă курмалли çулталăка халалласа лартнă. Вĕсен хушшинче вырăсла спектакльсем те, чăвашлисем те пулнă. Çамрăк артистсем хăйсен пултарулăхĕпе жюри членĕсене чăннипех те тĕлĕнтернĕ. Кашни шкул театрĕн спектаклĕсем хăйнеевĕрлĕхпе уйрăлса, актуаллă та интереслĕ шухăшпа палăрса тăнă, репертуар та тĕрлĕрен пулнă. Артистсен тумĕсене, декорацисене куракансен асĕнче юлмалла кăсăклă хатĕрленĕ.
Жюри членĕсем чи талантлă артистсене, чи лайăх спектакльсене тĕрлĕ номинацисенче палăртнă, чи пĕлтерĕшли вара — фестивалĕн муниципалитетри тапхăрĕн çĕнтерÿçине суйланă. Вĕсем йышăннă тăрăх, кăçал Вăрмар муниципаллă округĕнче Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулăн «Мельпомена» театрĕ /сăн ÿкерчĕк çинче\ «Общее счастье» спектакль кăтартса çĕнтерÿçĕ пулса тăнă. Руководителĕ – Е.И.Ларионова. «Мельпомена» Вăрмар округĕн чысне фестивалĕн республикăри тапхăрĕнче хÿтĕлĕ. Республикăри тапхăр ноябрĕн 12-мĕшĕнчен пуçласа декабрĕн 2-мĕшĕччен пырĕ.
Шкул театрĕсен «АСАМ» фестивалĕн çĕнтерÿçисене К.В. Иванов ячĕллĕ Чăваш академи драма театрĕн сцени çинче наградăлама палăртнă.
Ирина ДАНИЛОВА
