«Практика вăхăтĕнче вĕреннинчен лайăххи нимĕн те çук. Хăвăрт улшăнакан технологисен тĕнчинче ИТ-специалистсен пĕлĕвне ялан ÿстермелле, çĕннине ăса хывмалла. Ку мероприяти хăрушсăрлăхăн çивĕч задачисене пурнăçа кĕртме хăнăхтарать кăна мар, ĕçтешсемпе калаçма, опытпа, çĕнĕ шухăшсемпе паллашма май парать. Кунта хутшăнакансене вăхăта усăллă ирттерме ырă сунатăп», - палăртнă хăйĕн шухăшне ЧР цифра аталанăвĕн министрĕ Михаил Степанов. Çак кунсенче И.Н.Ульянов ячĕллĕ Чăваш патшалăх университетĕнче киберхăрушсăрлăха уямашкăн вĕренме практика занятийĕсем ирттерме полигон уçнă.
Чăваш патшалăх университечĕ кибервĕрентĕве иккĕмĕш хут ирттерет. Кăçал ăна çавăн пекех çĕнĕ «Cyber Wars» киберполигон никĕсĕ çинче те йĕркеленĕ. Ăна Чăваш патшалăх университечĕн магистранчĕ, «Инфогайд» тулли мар яваплă обществăн директорĕ Александр Иванов ирттернĕ. Асăннă проект «Студентсен стартапĕ» программа çĕнтерÿçи пулнă.
ЧР Цифра министерствин Информаци технологийĕн центрĕ тата ЧР Сывлăх сыхлавĕн министерствин Медицина информаципе аналитика центрĕ Чăваш патшалăх университечĕн информатикăпа шутлав техникин студенчĕсене информацие компьютерпа атакăланă вăхăтра мĕнле ĕçлемеллине кăтартнă.
Эвелина МИХАЙЛОВА хатĕрленĕ
