Вăрмарти Культурăпа кану çуртĕнче ачасемшĕн савăнăçлă та хаваслă уяв — Вăрмар муниципаллă округĕн администрацийĕн пуçлăхĕн йăлана кĕнĕ Раштав елки иртрĕ. Ачасене Вăрмар муниципаллă округĕн администрацийĕн пуçлăхĕ Василий Шигильдеев, Чăваш Республикинчи Ачасен прависене хÿтĕлессипе ĕçлекен уполномоченнăйĕн Вăрмар округĕнчи обществăлла пулăшуçи, «Ингосстрах» страховани компанийĕн Вăрмарти уйрăмĕн руководителĕ Ирина Алексеева, Вăрмар райпо Канашĕн председателĕ Марина Сейфуллина, Мăнçырмари чиркÿ настоятелĕ Леонид Ермолаев протоиерей саламларĕç.

Васили Викторович ачасене ятарлă çар операцине хутшăнакан ашшĕсене чĕрĕ-сывă килессе кĕтсе илме сунчĕ. Шел пулин те, пуçĕсене çапăçу хирĕсенче хунă ашшĕсемпе яланах мухтанма сунчĕ. «Пурне те хам ятран, хамăн çемье ятĕнчен, администраци ячĕпе Çĕнĕ çулпа, Раштав ячĕпе саламлатăп, мĕнпур ыррине сунатăп. 2025 çул пирĕн çĕршывшăн ăнăçлă пултăр. Пурнăçри хаклăхсене упраса, пĕр-пĕрне юратса, хисеплесе пурăнмалла пултăр», - терĕ хăйĕн сăмахĕнче Василий Шигильдеев.

Раштав елкине пухăннă ачасене пылак парнесемпе «Ингосстрах» страховани компанийĕ савăнтарчĕ. «Раштав уявĕ — чи çутă уяв. Турра юратăр ачасем, ĕненÿ çемьене те çирĕплетет, ырра вĕрентет. Уяв ячĕпе сире пурне те. Паянхи кун эсир пирĕн компанин пылак парнисемпе сăйланнишĕн эпир савăнатпăр», - терĕ Ирина Алексеева.

Чылай çул ĕнтĕ Вăрмар райповĕ «Ачасене — шоколад» ыркăмăллăх акцийĕ йĕркелесе ирттерет. «Вăрмар муниципаллă округĕнче пурăнакансене, хăнасене, çак акцине хутшăнакансене пурне те тав тăватпăр. Паян уява килнĕ пĕр ача та пылак парнесĕр юлмĕ. Пурне те мирлĕ пурнăç, ырлăх-сывлăх сунатпăр», - терĕ Марина Сейфуллина.

Пурнăçри тĕрлĕ лару-тăрури ача пуçтарăнчĕ Раштав елкине. Пурте вĕсем çак кун чунтан савăнни палăрчĕ. Культура ĕçченĕсем юмахри сăнрасенчен хатĕрленĕ театрализациленĕ кăтартăвĕ пурин кăмăлне те кайрĕ. Уява ачасемпе пĕрле пуçтарăннă аслисен те пĕрле тăрса ташлас, юрлас килсе тăчĕ. Хĕл мучипе Юри Пике сăвă калакан кашни ачана пылак кучченеçпе савăнтарчĕç. Хĕл Мучин миххине пылак кучченеçпе тултарма ЧР Патшалăх Канашĕн депутачĕ Леонид Пронин спонсорла пулăшу кÿнĕ.

Культура çуртĕнче фойере «Çулталăк символĕ» конкурса тăратнă чи лайăх ĕçсемпе паллашма май пулчĕ.

Добавить комментарий