Кивĕ Вăрмар ялĕнчен çак кунсенче ятарлă çар операцийĕнчи ентешсем патне гуманитари пулăшăвĕпе çитсе килчĕç.
Ялта маскировка сечĕсем çыхакансен коллективĕ хамăрăн салтаксем валли маскировка сечĕсем, ăшă çăм нускисем, ыхра, консервăсем, килте тунă варенисемпе консервăланă пахча-çимĕç банкисене парса ячĕç. Çавăн пекех ял халăхĕ пуçтарнă укçа-тенкĕрен чей, яшка пĕçермелли хутăшсем, нÿрĕ салфеткăсем, антифриз, генератор, ун валли ятарлă çу тата ыттине те туянса кайрĕç. Çавăн пекех чи пахи — «Мавик-3Т» çĕнĕ йышши квадрокоптер модельне илсе çитерсе пачĕç салтаксем валли. Унăн хакĕ 563 пин тенкĕ. Квадрокоптера туянса параканĕ — Санкт-Петербургри строительство енĕпе ĕçлекен «ВИДЖО» тулли мар яваплă обществăн пуçлăхĕ Андрей Васильевич Семенюк предприниматель. Кивĕ Вăрмар ялĕнчен ун патĕнче Александр Николаевич Григорьев прораб пулса ĕçлет. Шăпах вĕсем тăрăшнипе çак хаклă япала пирĕн ентешсем патне СВО-на çитрĕ те. Газель тулли япала илсе çитерчĕç ятарлă çар операцийĕ пыракан вырăна. Гуманитари тиевĕпе каякансен йышĕнче Кивĕ Вăрмартан Иван Борисов тата Чулкас ялĕнчен Дмитрий Григорьев пулчĕç. Вĕсем Украинăри Запорожск облаçĕнчи Васильевка хулине, Новомихайловка ялне хамăрăн ентешсем — Кивĕ Вăрмар, Чулкас ялĕсенчен СВО-на хутшăнакансем патне çитсе килчĕç. Кивĕ Вăрмар ялĕнчен мобилизаци йĕркипе 5 салтак хутшăнать çар операцине, вĕсем патне пурин валли те гуманитари пулăшăвĕ илсе çитернĕ волонтерсем. Иван Борисовпа Дмитрий Григорьев салтаксен ячĕпе Кивĕ Вăрмар, Чулкас ялĕсенче пурăнакансене — гуманитари пулăшăвĕ пуçтарса параканĕсене — пурне те чун-чĕререн тав тăваççĕ.
Эвелина МИХАЙЛОВА
