Вăрмар муниципаллă округĕн территорийĕнче аслă вĕрентÿ учрежденийĕсен представительствисене уçас тĕлĕшпе ĕçсем малалла пыраççĕ.
Ку енĕпе йышăну тăвас тĕллевпе иртнĕ кунсенче Вăрмар муниципаллă округĕн пуçлăхĕ Василий Шигильдеев И.Н.Ульянов ячĕллĕ Чăваш патшалăх университечĕн ректорĕпе Андрей Александровпа, Чăваш патшалăх аграри университечĕн проректорĕпе Надежда Алтыновăпа, Шупашкарти электромеханика колледжĕн представителĕсемпе тата экономика наукисен докторĕпе, Раççей ăслăлăхсен академийĕн советникĕпе Олег Асмуспа тĕл пулнă.
Тĕлпулу вăхăтĕнче вĕсем Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулта, çавăн пекех «Аквапром» тулли мар яваплă обществăра ĕçлĕ визитпа пулнă.
Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулта яваплă çынсем 9 тата 11 классенче вĕренекенсемпе тĕл пулса калаçнă. Хăнасене хăйсен пултарулăхĕпе шкулти кадетсем, параппанçă-хĕрсем тĕлĕнтернĕ.
Унтан яваплă çынсем шкулти Гуманитари центрне, библиотека центрне, хими, информатика, хăрушсăрлăхпа тăван çĕршыва хÿтĕлес никĕсĕсен /ОБЗР\ кабинечĕсене, сенсорлă кабинета, «Чăваш Ен сăнĕсем» проект шкулне, Çар Мухтавĕн залне, «Тĕрĕс наукăсем тата этноискусство» курав лапамне çитсе курнă. Вĕсем асăннă вĕрентÿ вырăнĕсен ĕçĕ-хĕлĕпе паллашнă, вĕрентекенсемпе вĕренекенсен уроксенчи тата урок тулашĕнчи хутшăнăвĕсене курса Вăрмар шкулĕ çинчен ырă сăмахсем каланă. И.Н.Ульянов ячĕллĕ Чăваш патшалăх университечĕн ректорĕ Андрей Александров университетпа тачă çыхăнса ĕçленĕшĕн Вăрмар шкулĕн дирекцине Тав çырăвĕпе чысланă, кунта ĕçлекен педагогсене тав сăмахĕ каланă.
«Аквапром» тулли мар яваплă обществăра пулнă май хăнасене унти ĕç процесĕпе предприяти учредителĕ Сергей Павлов паллаштарнă /сăн ÿкерчĕк çинче\. «Аквапром» — ăнăçлă тата кăтартуллă ĕçлекен предприяти. Заводра гидроаккумуляторсем, сарăлакан пичкесем туса хатĕрлессипе вăй хураççĕ. Хатĕр продукцие Мускава, Пензăна, Чулхулана, Хусана тата ытти хуласене те ăсатаççĕ. Ĕçе темиçе сменăпа йĕркеленĕ. «Аквапром» çултан-çул аталанса пырать, çĕнĕ производство цехне те ĕçлеттерсе янă. Предприяти Вăрмар муниципаллă округĕн социаллă пурнăçĕпе экономика аталанăвне пысăк тÿпе хывать, пĕлтерĕшлĕ вырăн йышăнать. «Аквапром» хальхи саманапа тан утнă май, производство процесне те хальхи технологисемпе усă курса йĕркеленĕ. Паллах, ĕç вăрттăнлăхне ăнланакан специалистсене предприятинче яланах хапăл.
Тĕлпулу тухăçлă иртнĕ. И.Н.Ульянов ячĕллĕ Чăваш патшалăх университечĕпе, И.Я.Яковлев ячĕллĕ Чăваш патшалăх педагогика университечĕпе, Чăваш патшалăх аграри университечĕпе тата ЧР Экономика аталанăвĕпе пурлăх хутшăнăвĕсен министерствипе нумай енлĕ килĕшÿ тума йышăннă.
«Пирĕн тĕп тĕллев — ку вăл Вăрмар округĕн, унăн экономикин аталанăвĕ, кунта пурăнакансен тăнăç пурнăçĕ. Ăна пурнăçлама тăрăшуллă çамрăк специалистсем кирлĕ. Вăрмар округĕнче аслă вĕренÿ заведенийĕсен представительствисене уçни çамрăксене шкул хыççăн хамăр округрах, аякка тухса каймасăрах, малалла вĕренсе дипломлă пулма, унтан ĕçе вырнаçма май парĕ», — тет Вăрмар муниципаллă округĕн пуçлăхĕ Василий Шигильдеев.
Ирина ДАНИЛОВА хатĕрленĕ
