Вăрмар округĕнче иртнĕ Чăваш Республикин Правительствин кунĕнче вăрмарсем Чăваш Республикин Пуçлăхне Олег Николаева хăйсене канăçсăрлантаракан ыйтусене панă.
Нумай ача амăшĕ Ирина Юрьевна Никонорова ăна Вăрмар поселокĕнчи 1 номерлĕ «Березка» ача сачĕ хупăнма пултарать текен хыпар пăшăрхантарнине пĕлтернĕ.
Кун пирки Олег Алексеевич çапла хурав панă: «Ашшĕ-амăшĕсен, уйрăмах темиçе ачаллисен, хумханăвне ăнланатăп. Ача садне 85 ача çÿрет, вăл меллĕ вырăнта вырнаçни çемьесемшĕн пысăк пĕлтерĕшлĕ. Çак кунсенче ашшĕ-амăшĕсем ман пата коллективлă çырупа тухрĕç. Лару-тăрăва тĕплĕ тишкертĕм, палăртсах калатăп: пирĕн ачасен интересĕсем яланах малти вырăнта. Çавăнпа ашшĕ-амăшĕсене лăплантарас килет. Ачасем хăйсем хăнăхнă тата юратакан ача садне малалла та çÿрĕç».
Ирина ДАНИЛОВА
