Красноармейски тата Çĕрпÿ округĕсенче иртнĕ Чăваш Республикинчи ялсенчи XI спорт вăййисенче вăрмарсен команди шашкăлла выляса 1-мĕш вырăна тухнине хаçат вулакансене çырса пĕлтернĕччĕ ĕнтĕ. Командăра пултаруллă та ăста шашистсем Марина Петрова тата Владимир Евгеньев пулнă.
Çĕнтерĕве кура ентешĕмĕрсем Чăваш Республикин пĕрлештернĕ команди йышĕнче Пĕтĕм Раççейри ялсенчи хĕллехи спорт вăййисене хутшăнма тивĕçнĕ. Мероприяти çак кунсенче Барнаул хулинче иртнĕ, ăна Аслă Çĕнтерĕве 80 çул çитнине халалланă.
Асăннă ăмăртусенче Чăваш Республикин пĕрлештернĕ команди 1-мĕш вырăна тухнă /ялсенче пурăнакансен шучĕ 450 пине çитекен регионсем хушшинче\. Чăваш Енри 9 муниципалитетри 20 спортсмен çĕршывăн 37 регионĕн представителĕсемпе йĕлтĕрпе чупассипе, полиатлон енĕпе, спортпа туслă çемьесен ăмăртăвĕсенче, шахматла, шашкăлла выляссипе, доярсемпе механизаторсен ăмăртăвĕсенче тупăшнă. Пирĕн шашистсен Марина Петровăпа Владимир Евгеньевăн лайăх результачĕсем Чăваш Ен командине çĕнтерÿ пьедесталĕн 1-мĕш картлашки çине хăпарма тÿпе хывнă. Саламлатпăр!
Александр КРАСНОВ, Вăрмар муниципаллă округĕн культура, социаллă аталану тата спорт пайĕн начальникĕ
