Чăваш Республикинчи шкул çулне çитмен ачасен учрежденийĕсене агролабораторисемпе тивĕçтерсех пыраççĕ. Хăшĕсене республика бюджетĕнчи уçка-тенкĕпе уçаççĕ, чылайăшĕн ĕçĕ-хĕлне муниципалитетсем тата ял хуçалăх таварĕсен производителĕсем пулăшнипе хута яраççĕ. Ача сачĕсен воспитанникĕсем агролабораторисенче çĕр ĕçченĕн ĕçĕ-хĕлĕпе тĕплĕнрех паллашаççĕ, тĕрлĕ ÿсентăран, пахчаçимĕç çитĕнтерме хăнăхаççĕ. Паллах, пуласлăхра кашни ача хăйĕн пурнăçне аграри профессийĕпе çыхăнтармĕ, анчах та агролабораторинчи занятисем пĕчĕк тĕпчевçĕсене ял хуçалăхĕ тата таврари çутçанталăк пирки ытларах пĕлме пулăшаççĕ.
Палăртма кăмăллă, Вăрмар округĕнчи 5 ача садĕнче те — Вăрмар поселокĕнчи «Родничок», «Березка», «Колосок», «Зоренька», Кĕтеснерти «Солнышко» ача сачĕсенче, çавăн пекех Арапуçĕнчи тĕп шкул çумĕнчи шкул çулне çитмен ачасен ушкăнĕнче те агролабораторисем уçăлнă. «Ача сачĕсенчи агролабораторисем — пирĕн республикăра йĕркеленĕ пĕлтерĕшлĕ проект, вăл ачасене мĕн пĕчĕкрен ял хуçалăх тĕнчин вăрттăнлăхĕсене шĕкĕлчеме май парать», — тет Чăваш Республикин Пуçлăхĕ Олег Николаев. Вăрмар округĕнче Чăваш Республикин Правительствин кунне ирттернĕ май Олег Алексеевич «Родничок» ача садĕнчи агролаборатори ĕçне хутшăнакан пĕчĕк тĕпчевçĕсемпе курнăçса калаçрĕ. Мĕнле кăна пахчаçимĕç, чечексем, ешĕл çимĕç çитĕнтермеççĕ пулĕ вĕсем! Регион Пуçлăхĕ ачасене малашне те хальхи пекех хастар пулма сунчĕ.
Аса илтеретпĕр, «Родничокри» агролаборатори пĕлтĕрхи октябрь уйăхĕнче ĕçлеме тытăннă. Агролабораторие «Вĕрентÿ» наци проекчĕн «Кашнин валли çĕнĕ майсем» федераллă проекчĕ шайĕнче уçнă. Ăна хута яма «Михайлов А.О.» хресчен-фермер хуçалăхĕн пуçлăхĕ Алексей Михайлов пысăк пулăшу кÿнĕ. Агролабораторие хальхи йышши оборудованипе, инструментсемпе — лупăсемпе, пробиркăсемпе, колбăсемпе, микроскопсемпе, чÿлмексемпе, каткасемпе, лейкăсемпе, çавăн пекех лартмалли вăрлăхпа та — тивĕçтернĕ.
Ача садĕнчи кашни ушкăнрах агробригадăсем ĕçлеççĕ. Вĕсем агролабораторинче хăйсен кĕтесĕсене йĕркелесе унта тĕрлĕ ÿсентăран çитĕнтереççĕ, опытсемпе сăнавсем, тĕпчевсем ирттереççĕ, мастер-классем йĕркелеççĕ. Сăмахран, хальхи вăхăтра вĕсем пĕрремĕш хăяр мĕнле çитĕннине сăнаççĕ. Хăйсем лартнă, тăрăшса ÿстернĕ хăяр çимĕç панине курни вĕсене çав тери савăнтарать тата хавхалантарать.
Чăнах та, вăрлăх акни, ăна кунсерен пăхса, шăварса тăни, ÿсентăран мĕнле çитĕнни ачасемшĕн питĕ интереслĕ. Агролабораторинче мĕн ĕçленине, ÿсентăран мĕнле ÿссе улшăннине вĕсем ятарлă дневникре палăртса пыраççĕ. Çапла майпа ачасем ĕçлеме те хăнăхаççĕ, çутçанталăка упрамаллине те ăса хываççĕ. «Ачасем агролаборатори ĕçне хутшăнни вĕсене малашлăхра пысăк усă кÿрессе, пулас профессине суйлама пулăшасса шанатпăр», — тет «Родничок» ача сачĕн заведующийĕ Марина Васильевна Иванченко.
Каласа хăварас пулать, «Родничок» ача сачĕн коллективĕ хăйĕн ĕçне чунтан парăнса пурнăçлать, ачасене тĕрĕс воспитани парассипе ырми-канми тăрăшать. Çавăнпа çитĕнĕвĕсем те курăмлă вĕсен. Акă, республика шайĕнчи «Çулталăкăн чи лайăх методисчĕ-2025» конкурсра «Родничокри» аслă воспитатель Наталья Вениаминовна Семенова лауреат пулса тăнă. Инна Анатольевна Громова воспитатель вара Пĕтĕм Раççейри «Çулталăк воспитателĕ-2025» професси ăсталăхĕн конкурсĕн муниципалитетри тапхăрĕнче çĕнтернĕ.
Ирина ДАНИЛОВА
