Чăваш Ен Пуçлăхĕ Олег Николаев ĕç тăвакан влаç органĕсен тата муниципалитетсен ертÿçисемпе тунтикун ирттернĕ канашлура вице-премьер — экономика аталанăвĕн министрĕ Дмитрий Краснов хаксем пирки сăмах хускатнă. Вĕсен ÿсĕмĕн хăвăртлăхĕ Раççейри вăтам шайран кăшт пысăкрах. Сăлтавсенчен пĕрне Дмитрий Иванович апат-çимĕç хакĕсем Раççейри вăтам шайпа танлашма ăнтăлнинче курать. Çавна май вăл уйрăм ĕçме-çиме хакĕсене те асăннă. Калăпăр, çĕр улми республикăра 36% чухлĕ хакланнă, анчах унăн хакĕ пурпĕр çĕршыври вăтам виçерен пĕчĕкрех. Хĕрлĕ кăшман, кишĕр, сухан пирки те çавнах каламалла. Пĕтĕмĕшле илсен те пахча çимĕç хакĕсем Раççейри вăтам шайран пĕчĕкрех. Вĕсен ÿсĕмне витĕм кÿрес тĕллевпе суту-илĕвĕн 13 организацийĕпе тата производительсемпе хаксене пĕр шайра тытса тăма çур çуллăха килĕшÿ тунă. Тепĕр мел — ярмăрккăсем. Вĕсенчи хаксем лавккарисенчен 20% пĕчĕкрех.
Ял хуçалăх министрĕн тивĕçĕсене пурнăçлакан Ольга Кудрявцева продукци ытларах туса кăларни хаксене витĕм кÿме пулăшнине палăртнă. Ку енĕпе кăтартусем аван. Апат-çимĕç туса кăларассине республикăра 7,9% ÿстернĕ. Тĕрлĕ шĕвек производстви те 6,5% пысăкланнă. Аш-какай калăпăшне ÿстернĕ, çăмарта тĕлĕшпе дефицит çук. Патшалăх пулăшăвĕ те курăмлă: кăçал патшалăх ял хуçалăхĕ валли 5,3 млрд тенкĕ уйăрма палăртать.
Николай КОНОВАЛОВ
