Вăрмар муниципаллă округĕнчи педагогика ĕçченĕсен «Сектор У» команди Тутар, Чăваш, Мари Эл Республикисенчи вĕрентÿ ĕçченĕсен республикăсем хушшинчи «Татчумара-2025» 53-мĕш турслетне хутшăннă. Мероприяти «Çамрăксем тата ачасем» çĕнĕ наци проекчĕн тĕллевĕсемпе тата задачисемпе килĕшÿллĕн иртнĕ.
Турслета 22 команда хутшăннă, вĕсенчен тăваттăшĕ Чăваш Ен чысне хÿтĕленĕ. Ку вăл Шупашкар хулин, Вăрмар тата Çĕрпÿ муниципаллă округĕсен, çавăн пекех И.Я.Яковлев ячĕллĕ Чăваш патшалăх педагогика университечĕн командисем.
Турслет Мари Эл Республикинчи «Хыр вăрманĕ» вĕрентÿпе тренировка базин территорийĕнче иртнĕ. «Сектор У» командăра Вăрмар муниципаллă округĕн администрацийĕн вĕрентÿпе çамрăксен политикин пайĕн, А.Ф.Федоров ячĕллĕ Вăрмарти спорт шкулĕн, Г.Е.Егоров ячĕллĕ Вăрмарти вăтам шкулăн, Энĕшпуçĕнчи вăтам шкулăн, Чулкасри вăтам шкулăн Кĕлкешри уйрăм структурăллă подразделенийĕн ĕçченĕсем пулнă: Виктор Павлов, Ирина Лукина, Сергей Михайлов, Станислав Иванов, Виктор Некрасов, Анна Петрова, Светлана Романова.
Команда турслетра хăйне лайăх енчен кăтартнă, тĕрлĕ ăмăртусемпе конкурссенче мала тухнă. Таврапĕлÿçĕсемпе экологсен конкурсĕнче, «Турист кухни» конкурсра 1-мĕш вырăнсене йышăннă. Туризмпа таврапĕлÿ проекчĕсен конкурсĕнче те /проекта хатĕрлекенĕ Светлана Романова\ вăрмарсене çитекенни пулман.
Уйрăмшар иртекен ăмăртусенче те ăнăçу пирĕннисемпе юнашарах пулнă. Палăртнă дистанцие çуран утса тухмалли ăмăртура Виктор Павлов 2-мĕш вырăна тивĕçнĕ. Çул тупмалли ăмăртура та 2-мĕш пулнă вăл. Çавăн пекех Ирина Лукина та çул тупмалли ăмăртура 2-мĕш вырăна çĕнсе илнĕ.
Пĕтĕмлетсе каласан, çак çитĕнÿсем вăрмарсен командин пултарулăхне, вĕсем чăн-чăн профессионалсем пулнине туллин çирĕплетнĕ.
