Чăваш Республикин Пуçлăхĕ Олег Николаев 2024-2025 вĕренÿ çулĕнчи Пĕтĕм Раççейри шкул ачисен олимпиадин юлашки тапхăрĕн çĕнтерÿçисемпе тата призерĕсемпе тĕл пулнă. Чăваш Енри шкул ачисем çак çулсем хушшинче пĕрремĕш хутчен олимпиадăн юлашки тапхăрĕнче 6 çĕнтерÿпе палăрнă — физика, географи, биологи, литература тата экологи предмечĕсемпе мала тухнă.
«5 çул каялла эпир пирĕн вĕрентÿ тытăмĕ çамрăк педагогсемпе наставниксемшĕн интереслĕ пултăр тесе сăмах хускатнă май вĕрентÿ учрежденийĕсене тĕпрен улăштарма тытăнтăмăр — шкулсене юсаса оборудованипе тивĕçтертĕмĕр, вĕрентÿ процесне çĕнетрĕмĕр. Ку вăл çамрăк вĕрентекенсене вĕрентÿ тытăмне ытларах илĕртме пулăшрĕ, ачасем вара лайăх результатсемпе палăрма тытăнчĕç. Кăçал, акă, çĕнтерÿçĕсен йышĕ татах та ÿснĕ. Çапла эпир тĕрĕс çулпа утăмлани куçкĕрет. Малалла та эффективлă ĕçлеме, тĕллевсене пурнăçлама тăрăшăпăр», — палăртнă Олег Алексеевич.
Пĕтĕм Раççейри шкул ачисен олимпиадин юлашки тапхăрĕн çĕнтерÿçисем тата призерĕсем Чăваш Республикин Пуçлăхĕн Олег Николаевăн аллинчен Тав çырăвĕсем илме тивĕçнĕ. Вĕсен хушшинче пирĕн ентеш те — Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулта 11 класра вĕренекен, олимпиадăра экологипе çĕнтернĕ Ангелина Владимировна Семенова пулнă /сăн ÿкерчĕк çинче/. Унăн руководительне те — асăннă шкулта биологи тата хими предмечĕсене вĕрентекен Клавдия Анатольевна Николаевăна Тав çырăвĕпе чысланă /сăн ÿкерчĕк çинче/.
Чăваш Ен Пуçлăхĕн Хушăвĕпе килĕшÿллĕн, призерсене хатĕрленĕ педагогсем укçан хавхалантарăва — 150 пин тенкĕне тивĕçеççĕ, çĕнтерÿçĕсене хатĕрленĕ педагогсем — 250 пин тенкĕне.
Пĕтĕм Раççейри шкул ачисен олимпиадин çĕнтерÿçисемпе призерĕсем çĕршывăн ертсе пыракан вĕрентÿ заведенийĕсене çăмăллăхлă майпа вĕренме кĕме пултараççĕ. 4 çул вăйра тăракан дипломсем профильпе экзамен тытмасăрах вĕренме кĕме, унсăр пуçне вĕреннĕ тапхăрта укçа-тенкĕ пулăшăвĕ илсе тăма та май параççĕ.
Ирина ДАНИЛОВА
