«Çемье» наци проекчĕн «Çемье хаклăхĕсем тата культура инфратытăмĕ» направленийĕ пулăшнипе пирĕн мăнаçлă культура пуянлăхĕ çĕршывра пурăнакан кашни çыншăн çывăхрах пулса тăрать.

Ачаллă çемьесем курав­сенче, музейсенче, театрсенче искусство произведени­йĕсемпе паллашма пултараççĕ, çавна май вĕсем тĕрлĕ енлĕ аталанаççĕ, вăхăта пĕрле ирттереç­çĕ. Музейсемпе театрсем, культура çурчĕсемпе библиотекăсем, искусство шкулĕсем хăйсем те патшалăх енчен пулăшу илеççĕ, федераци проекчĕсем шайĕнче çĕнелеççĕ. Пĕчĕк ял-хуласенче вара хальхи йышши кинозалсем уçăлаççĕ. Унсăр пуçне çĕршывăн тĕр­лĕ регионĕсенче çарпа патриотла тÿлевсĕр лагерьсен ĕçне йĕркелеççĕ. Цирк артисчĕсем валли пĕтĕм Раççейĕ­пех хăтлă общежитисем хăпартаççĕ. Ку вăл вĕсене çĕршывăн тĕрлĕ кĕтесне гас­трольсемпе тухса çÿреме тата хăтлă условисенче пурăнма май парать.

Чăваш Республикинче «Çемье» наци проекчĕн «Çемье хаклăхĕсем тата культу­ра инфратытăмĕ» нап­равленийĕ шайĕнче биб­лиотекăсене аталантарассине пысăк тимлĕх уйă­раççĕ. Муниципалитетсенче модельлĕ биб­лиотекăсем уçасси малти вырăнта. Вĕсене кашнине хăтлă сĕтел-пуканпа, интерактивлă технологисемпе тивĕçтереççĕ, элект­рон изданисемпе усă курма майсем туса параççĕ.

Палăртмалла, Вăр­мар округĕнчи Чулкас ялĕнчи библиотека та кăçал «модельлĕ» ята тивĕçĕ. Библиотека Чăваш Республикин бюджетĕнчен субсиди илме заявка тăратса конкурс­ра çĕнтернĕ. Паянхи кун тĕлне Чулкас библиотекине модернизацилес тĕлĕшпе активлă ĕçлеççĕ. Çĕнетнĕ библиотекăра пахалăхлă юсав пулĕ, фонда çĕнĕ кĕнекесемпе тата аталантаракан вăйăсемпе пуянлатĕç, çĕнĕ сĕтел-пуканпа тата оборудованипе тивĕçте­рĕç. Кĕнеке вуламалли, творчество валли, калаçусем, мероприятисем ирттерме уйрăм вырăнсем пулĕç. Чи пĕл­терĕшли — ачасемпе çамрăксене, аслă ăру çыннисене биб­лиотекăра интереслĕ пултăр тесе тăрăшаççĕ.

Ирина ДАНИЛОВА

Олег НИКОЛАЕВ, Чăваш Республикин Пуçлăхĕ: «Хальхи саманара библиотека кĕнеке упрамалли çурт кăна мар. Вăл халăха пĕр­лештерекен вырăн. Кунта кĕнеке вулама, пĕр шухăшлă çынсемпе тĕл пулса калаçма, шăплăхра проектсем çырма та килеççĕ. Библиотекăсенче хальхи технологисемпе тата çăлкуçсемпе эффективлă усă курса çĕнĕлле ĕçлеме пулать. Вулакансен, библиотека сферин ĕçченĕсен шухăш-кăмăлне шута илсе библиотекăсене малалла та аталантарăпăр, инфратытăма çĕнетĕпĕр».

Добавить комментарий