Иртнĕ кунсенче Тăвай муниципаллă округĕнчи «Медвежий угол» кану вырăнĕнче «Ялта чи лайăххисем» çамрăксен тăваттăмĕш агрослечĕ иртрĕ. Асăннă мероприятие «Çĕнтерĕве пĕрле кĕтсе илетпĕр» девизпа килĕшÿллĕн йĕркеленĕ. Вăл Чăваш Енри 1600 ял çамрăкне пĕрлештерчĕ. Çавăн пекех ку мероприятие Атăлçи федераллă округĕнчи регионсенчен 70-е яхăн хăна та килсе çитнĕ. Унпа пĕрлех кунта ятарлă çар операцине хутшăнакансем тата ветерансем те пулчĕç.
Чăваш Республикин Пуçлăхĕ Олег Николаев агрослета хутшăннисене саламланă май асăннă мероприяти регионшăн пысăк пĕлтерĕшлĕ пулнине палăртрĕ. «РФ Президенчĕн Атăлçи федераллă округĕнчи полномочиллĕ представителĕ Игорь Анатольевич Комаров тĕрев пани, Атăлçи федераллă округĕнчи регионсенчен килнĕ çамрăксем тата «Раççейри ял çамрăкĕсен союзĕ» Пĕтĕм Раççейри çамрăксен обществăлла организацине ертсе пыракансем асăннă мероприятие активлă хутшăнни пирĕн пуçарулăх çÿллĕ шайра пулнине палăртать. Çак проекта малашне те аталантарăпăр», - терĕ Олег Алексеевич.
Чăваш Ен Пуçлăхĕ Олег Николаев çавăн пекех «Çĕнтерĕве пĕрле кĕтсе илетпĕр» ятпа йĕркеленĕ дискусси площадкине çитсе курчĕ. Вăл Тăван çĕршывăн Аслă вăрçин паттăрĕсене, паттăрла ĕçĕсене хальхи обществăн яланах асра тытмаллине палăртрĕ. «Пирĕн мăн асаттесемпе асаннесем вăрçă вăхăтĕнче паттăрлăхпа, хăюлăхпа, фронтра та, тылра та ырми-канми ĕçĕсемпе палăрнă. Çак Çĕнтерÿ пирĕншĕн пысăк пĕлтерĕшлĕ пулнине яланах асра тытмалла. Кăçал агрослетра кашни муниципалитет Аслă Çĕнтерĕве çывхартма пулăшнă паттăрсем, вĕсен ĕçĕсем çинчен анлăн çутатса пачĕ. Кунта ятарлă çар операцине хутшăнакан паттăрсем тата ветерансем пĕрле пулни пысăк пĕлтерĕшлĕ, мăнаçлăх туйăмĕ çуратать», — терĕ Олег Алексеевич.
«Агропродакшн: паллă ял блогерĕ мĕнле пулмалла?» ятпа иртнĕ дискусси площадки те хăйне евĕрлĕ пулчĕ. Кунта çамрăксем йышлăн хутшăнчĕç. Агрослетра çавăн пекех спорт вăййисем те иртрĕç. Квадроциклпа чупассипе Вăрмар тăрăхĕнче çуралса ÿснĕ Дмитрий Петров вара пĕрремĕш вырăн çĕнсе илчĕ. Çавăн пекех вăрмарсем хатĕрленĕ пулă яшки те чи тутлисен шутĕнче пулчĕ.
Пĕтĕмĕшле каласан, агрослет интереслĕ те çамрăксемшĕн усăллă иртрĕ.
Ирина ВАСИЛЬЕВА, Вăрмар муниципаллă округĕн администрацийĕн экономика тата çĕрпе пурлăх хутшăнăвĕсен пайĕн начальникĕ
