Çар тивĕçне тÿрĕ кăмăлпа пурнăçласа, Тăван çĕршыва хÿтĕлесе, тăшманпа çапăçса пуçне хунă кашни паттăрăн ячĕ нихăçан та манăçа тухмĕ. Вĕсем ĕмĕрлĕх астăвăмра юлĕç, ăруран ăрăва куçса пырса пирĕн асăмăрта упранĕç.
Аслă Чак ялĕнче пурăнакансем те Украинăри ятарлă çар операцийĕнче паттăрсен вилĕмĕпе вилнĕ хăйсен салтакĕсене асăнса çак кунсенче ял центрĕнче стелăсем вырнаçтарнă. Пурĕ виçĕ ят, виçĕ сăн ÿкерчĕк кунта: Евгений Алексеевич Михайлов, Алексей Сергеевич Сергеев, Александр Михайлович Иванов.
Ял халăхĕ пĕрлĕхре пулнипе, Аслă Чак ялĕн старости Владимир Петрович Иванов ертсе пынипе, салтаксен тăванĕсемпе çывăх çыннисем тăрăшнипе, пурте пĕр тĕллевлĕ пулса укçа-тенкĕ пуçтарнипе пурнăçланă çак пысăк та пархатарлă ĕçе. Халĕ ĕнтĕ стелăсем ларакан территорие тирпей-илем кĕртес тĕллевлĕ аслăчаксем. Вĕсем кунта бордюрсем хурасшăн, вак чул сарасшăн, чечексем лартасшăн.
