Çак кунсенче Кавал ялĕнчи стадионта пысăк спорт мероприятийĕ — пĕртăван Павловсен парнисене çĕнсе илессишĕн мини-футбол енĕпе матч иртрĕ.
Мероприятие уçнă май пухăннисен умĕнче саламлă сăмахсемпе Кавалти территори пайĕн начальникĕ Василий Адюков, «Çĕнĕ Кавал» команда представителĕ Сергей Степанов, «Йăвăнчă» тата «Йăвăнчă-2» командăсен представителĕ Асхат Садыков, çавăн пекех турнира йĕркелекенсем Александр Павлов тата Кирилл Павлов тухса калаçрĕç, спортсменсене турнира ăнăçлă ирттерме, тÿрĕ кăмăлпа тупăшма сунчĕç.
Матча пурĕ 6 футбол команди хутшăнчĕ: «Вăрмар», «Çĕнĕ Кавал», «Йăвăнчă», «Йăвăнчă-2», «Кавал», «Кавал-2». Вăйăсем çивĕч те интереслĕ иртрĕç. Матч пĕтĕмлетĕвĕ тăрăх 1-мĕш вырăна «Вăрмар» команда /Вăрмар поселокĕ/ йышăнчĕ, 2-мĕш вырăна «Çĕнĕ Кавал» команда /Çĕнĕ Кавал ялĕ/ тивĕçрĕ, 3-мĕш вырăна вара «Йăвăнчă» команда /Тутар Республикинчи Йăвăнчă ялĕ/ тухрĕ.
Малти вырăнсене йышăннă футбол командисене грамотăсемпе тата медальсемпе, Кубоксемпе тата пылак парнесемпе наградăларĕç. Ытти командăсене те тимлĕхсĕр хăварман, пурне те пылак парнесемпе савăнтарнă.
Унсăр пуçне матчăн чи пултаруллă вăйăçисене тĕрлĕ номинацисенче палăртрĕç. «Чи лайăх бомбардир» ята 7 гол тапса кĕртсе «Çĕнĕ Кавал» командăри Илья Соловьев тивĕçрĕ. «Чи лайăх вратарь» ята «Йăвăнчă-2» командăри Захар Гатауллина пачĕç. «Кавал» командăри Тимур Покровский «Чи лайăх хÿтĕлевçĕ» пулса тăчĕ. «Чи лайăх футболист» тесе «Йăвăнчă-2» командăри Сабина Батыршинăна йышăнчĕç. Пурне те вĕсене грамотăсемпе тата Кубоксемпе наградăланă.
Пĕртăван Павловсен парнисене çĕнсе илессишĕн мини-футбол енĕпе иртнĕ матча хутшăннă кашни команда çав тери пултаруллă пулнине палăртас килет, уйрăмах финала тухнă командăсем ăсталăхĕпе тĕлĕнтерчĕç. Матч судйисем Александр Павлов тата Кирилл Павлов, матч секретарĕ Кристина Павлова хăйсен тивĕçĕсене тÿрĕ кăмăлпа пурнăçларĕç.
Мероприятие йĕркелекенсене тата спонсорсене — Александр Павловпа Кирилл Павлова — тĕрлĕ енлĕ пулăшу кÿнĕшĕн, матча ирттерме пулăшнăшăн ырă кăмăллă çынсене пурне те тав сăмахĕ калатпăр.
Çакăн пек спорт мероприятийĕсем çынсен хушшинчи туслăха çирĕплетеççĕ. Çамрăксене те, аслăрах ÿсĕмрисене те физкультурăпа спорта явăçтараççĕ, сывă пурнăç йĕркине тытса пыма хавхалантараççĕ.
Кристина ПАВЛОВА
