Чăваш Республикин Пуçлăхĕ Олег Николаев Чăваш Енре пурăнакан, хăйсен ĕçĕнче палăрнă ентешсене патшалăх наградисемпе чысланă. Вĕсен хушшинче — электроэнергетикăпа ял хуçалăх отраслĕн, пулăшусен сферин, сывлăх сыхлавĕн работникĕсем, культура деятелĕсем, вĕрентекенсем, экономистсем, вăрманçăсем, нумай ачаллă ашшĕ-амăшĕсем, çавăн пекех граждансен пурнăçне çăлса палăрнă çынсем те. Пурте вĕсем Чăваш Республикин социаллă тата экономика аталанăвне пысăк тÿпе хывнă.
Чăваш Республикин Пуçлăхĕ Олег Николаев наградăна тивĕçнисене вĕсен курăмлă ĕçĕшĕн тата пурнăçри çирĕп позицишĕн тав тунă. «Эсир Чăваш Ен ырлăхĕшĕн тÿрĕ кăмăлпа вăй хунăран пирĕн республика çитĕнÿсен çулĕпе утăмлать. Ăнăçу никĕсĕ — шăпах эсир хывнă тÿпере. Тавах сире ĕçченлĕхшĕн, харсăрлăхшăн тата тăван çĕре юратнăшăн», — палăртнă Олег Алексеевич.
Патшалăх наградине тивĕçнĕ хисеплĕ çынсем хушшинче Вăрмар муниципаллă округĕн администрацийĕн Пинерти территори пайĕн тĕп специалист-эксперчĕ Людмила Анатольевна Боредская та пулнă /сăн ÿкерчĕк çинче – пĕрремĕш ретре сулахайран иккĕмĕшĕ\. Ăна «Чăваш Республикинчи вырăнти хăйтытăмлăх органĕсенчи лайăх службăшăн» наградăпа палăртнă.
Людмила Анатольевна Боредская вырăнти хăйтытăмлăх органĕсенчи ĕç кун-çулне 1989 çулта Пинер ял Совечĕн ĕç тăвакан комитечĕн секретарĕнче вăй хума тытăннинчен пуçланă. Пинерти территори пайĕн тĕп специалист-эксперчĕ пулса 2022 çултанпа тăрăшать. Унăн ĕçĕ яваплă та çăмăл мар. Мĕн тĕрлĕ документпа ĕçлемелле, мĕн тĕрлĕ ĕç пурнăçламалла пулĕ... Анчах тÿрĕ кăмăллă, мал ĕмĕтлĕ специалист йывăрлăхсен умĕнче парăнма хăнăхман, пуçланă ĕçе вĕçне çитеретех.
Людмила Анатольевна Пинер ял тăрăхĕнче пуçарулăх бюджечĕн программи шайĕнче проектсем хатĕрлесе пурнăçлама, тĕрлĕ мероприятисем ирттерме, ĕç хучĕсем туса хатĕрлеме активлă хутшăнать. 1998 çултанпа Пинерти участокри суйлав комиссийĕн председателĕн тивĕçĕсене хăй çине илнĕ. Тĕрлĕ шайри суйлавсем хатĕрлесе ирттерессипе яваплăн ĕçлет. Пĕтĕм Раççейри ял хуçалăх перепиçне, халăхсен перепиçне ирттерме те хутшăннă.
2015 тата 2018 çулсенче Людмила Анатольевна «Вăрмар районĕнчи чи лайăх муниципаллă служащи» конкурсра çĕнтернĕ. Унăн наградисен пухмачĕнче — Вăрмар район администрацийĕн пуçлăхĕн, Вăрмар муниципаллă округĕн администрацийĕн пуçлăхĕн, ЧР Патшалăх Канашĕн Хисеп грамотисем, «Единая Россия» партин Чăваш Республикинчи уйрăмĕн Тав çырăвĕсем тата ытти те. 2012 çулта «Ĕç ветеранĕ» хисеплĕ ята тивĕçнĕ.
Тăван çĕршыва юратса, тăван тăрăха аталантарассишĕн вăй хурать Людмила Анатольевна. Ĕçченлĕхне тата ырă кăмăлне кура ял-йыш хушшинче пысăк хисепре вăл. «Чăваш Республикинчи вырăнти хăйтытăмлăх органĕсенчи лайăх службăшăн» наградăна тивĕçнĕ ятпа ăшшăн саламлатпăр ăна!
Ирина ДАНИЛОВА
