Июнĕн 28-мĕшĕнче Вăрмар округĕнчи пĕтĕмĕшле пĕлÿ паракан вĕрентÿ учрежденийĕсенче, пĕтĕм çĕршыври пекех, ăсату каçĕсем иртнĕ. Çак каç Вăрмар округĕнчи 71 выпускник шкулпа сывпуллашнă.
22 выпускник вăтам шкула чи лайăх паллăсемпе вĕренсе пĕтернине çирĕплетекен аттестатсене, вĕренÿре уйрăмах палăрнăшăн медальсемпе Мухтав грамотисене тивĕçнĕ, вĕсен ашшĕ-амăшĕсене вара Тав çырăвĕсем панă.
Ăсату каçĕнче кашни шкултах хисеплĕ хăнасем, депутатсем, вĕрентекенсем тата, паллах, ашшĕ-амăшĕсем выпускниксене ăшă та ырă сăмахсем каласа хавхалантарнă. Уяв пĕр енчен савăнăçлă, тепĕр енчен хурлăхлă та пулнă. Шкул çулĕсем вĕçленни — çитĕнекен ăрушăн пĕлтерĕшлĕ тапхăр. Шкулпа, вĕрентекенсемпе, юлташсемпе сывпуллашни вĕсен чунĕсене яланах хумхантарать.
Выпускниксен пуласлăхĕ çутă та телейлĕ пуласса, шкулта илнĕ пĕлÿ çĕнĕ çитĕнÿсем тума пулăшасса, кашни çамрăк килĕшекен професси суйласа пурнăçра хăйĕн çулне тупасса шанатпăр. Выпускниксен çитĕнĕвĕсем пире яланах савăнтараççĕ. Çулсеренех вĕсем патшалăхăн пĕрлехи экзаменĕсене ăнăçлă тытаççĕ, 2025 çулхи результатсем те аван пулчĕç. Экзамена 100 балпа тытнă выпускник те пур пирĕн кăçал. Ку вăл Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулти 11 класран вĕренсе тухнă Ольга Лаврентьева /сăн ÿкерчĕк çинче\. Вăл чи пысăк бала физика предмечĕпе тивĕçнĕ. Вĕрентекенĕ — Валерий Васильевич Андреев. Саламлатпăр, мăнаçланатпăр, малашне те вĕренÿре, пурнăçра çĕнтерÿсем тума сунатпăр!
Сергей ПАВЛОВ, Вăрмар муниципаллă округĕн администрацийĕн пуçлăхĕн заместителĕ — вĕрентÿпе çамрăксен политикин пайĕн начальникĕ
