Шупашкар хули август уйăхĕн 16-17-мĕшĕсенче 556-мĕш çуралнă кунне паллă тума хатĕрленет.
Кăçал тĕп хулара пурăнакансемпе хăнасене мĕнле çĕнĕлĕхсем кĕтĕç? Культура управленийĕн пуçлăхĕ Людмила Маркова пĕлтернĕ тăрăх, кăçал уяв мероприятийĕсем валли виçĕ пысăк лапам — Юрă уйĕ, Мускав çыранĕ тата Хĕрлĕ тÿрем — уйăрнă. Кунсăр пуçне парксенче, нумай хутлă çуртсен картишĕсенче 40 ытла мероприяти ирттерме палăртнă.
Юрă уйĕ спорт мероприятийĕсен тĕп вырăнĕ пулса тăрĕ. Вĕсене юрă-кĕвĕ пуянлатĕ. Чăваш Енри юрăçсем, çавăн пекех Чулхуларан, Хусантан килнĕ коллективсем уяв кăмăлĕ парнелĕç.
Хĕрлĕ тÿремри тĕп мероприяти «Русское лето. ZаРоссию» фестиваль пулĕ. Ăна йĕркелекенсен шутĕнче — «Халăх фрончĕ». Общество юхăмĕн представителĕсем «Пĕтĕмпех Çĕнтерÿ валли» лапам йĕркелĕç. Унта вĕсем гуманитари пулăшăвĕ, граждансене харпăр хăй ыйтăвĕсемпе йышăнĕç, «Тăван çĕршыв хÿтĕлевçисем» фонд специалисчĕсем консультаци парĕç.
Хĕрлĕ тÿремре «Шупашкар çемйи» парад пулĕ. Çемьесем валли пултарулăх, спорт, интеллект тупăшăвĕсем йĕркелĕç. Мускав çыранĕнче вара иртнĕ ĕмĕрĕн 60-70-мĕш çулĕсенчи пурнăç вĕресе тăрĕ.
Хула кунне чăваш эстарада юрăçисем, Шупашкарти коллективсем юрă-ташăпа пуянлатĕç. Уява «Иванушки International» ушкăн пысăк концертпа вĕçлĕ.
