«Финанс пĕлÿлĕхĕн никĕсĕсем» программа тата «Çемье» наци проекчĕ шайĕнче Вăрмарти халăха социаллă пулăшу кÿрекен комплекслă центрăн çемьепе ĕçлекен специалисчĕ Антонина Кошкина ачасем валли тĕрлĕ мероприятисем йĕркелесе ирттернĕ.
«Тратим разумно, сберегаем и экономим» темăпа иртнĕ калаçура ачасем укçапа тĕрĕс мĕнле усă курмаллине пĕлнĕ, укçана перекетлемелли çăмăл мелсемпе паллашнă.«Техника безопасности использования банковских карт» вăйăра ачасем финанс тĕнчи тăрăх «çулçÿревре» пулнă. Вĕсем дебет тата кредит карттисене уйăрма вĕреннĕ, вĕсен пиччен тата тÿнтер енĕсенче мĕн çырнине ăнланма хăнăхнă. «Монетный двор» занятинче вара хăйсене чăн-чăн ÿнерçĕсем пек туйма пултарнă, харпăр хăйсен укçине шутласа тупса ÿкернĕ.
Антонина Кошкина специалист палăртнă тăрăх, çакăн евĕр мероприятисем çитĕнекен ăрушăн пысăк пĕлтерĕшлĕ. Вĕсем ачасен финанс пĕлÿлĕхне ÿстереççĕ, перекетлĕхе хăнăхтараççĕ, банк карттисемпе хăрушлăхсăр усă курма вĕрентеççĕ.
Ачасен сывлăхне çирĕплетмелли «Романтика» лагерьте те 4-мĕш сменăра канакан аслă ÿсĕмри воспитанниксемпе «Финансовая гармотность: успешное управление деньгами» лекци иртнĕ. Лекцие «Знание» Раççей обществин лекторĕ Татьяна Гаврилова ирттернĕ. Пухăннисем укçа мĕн тума кирлине сÿтсе явнă, расхутсене тĕрĕс йĕркелеме вĕреннĕ, финанс пĕлÿлĕхĕн принципĕсемпе паллашнă.
