Чăваш Республикинчи 11 ача-пăча сачĕпе 9 шкул хăйсен ĕçĕ-хĕлне аталантарма кашни 500 пин тенкĕне тивĕçнĕ. Укçа-тенкĕне Чăваш Республикин Пуçлăхĕн Олег Николаевăн грант памалли программипе уйăрнă.
Конкурс çивĕч иртнĕ, ун витĕр чи лайăх проектсем кăна тухнă. Вĕрентÿ учрежденийĕсене укçа-тенкĕ пани хальхи саманари вĕрентÿ технологийĕсене ĕçе кĕртме, цифра тата творчество проекчĕсене аталантарма, ачасене пĕлÿпе воспитани парассипе хăтлă тата инновациллĕ условисем йĕркелеме пулăшĕ.
Пĕлтерме кăмăллă, 500 пин тенкĕлĕх грант илме тивĕçнĕ вĕрентÿ учрежденийĕсем хушшинче Вăрмар поселокĕнчи 3 номерлĕ «Зоренька» ача-пăча сачĕ те пур. «Зоренька» ĕçченĕсем хатĕрленĕ проект ача сачĕн территорийĕнче метеостанци вырнаçтарассипе çыхăннă. Конкурсра çĕнтерни çак хăюллă тĕллеве пурнăçлама май парать халĕ. Метеостанци комплексĕ ачасен экологи пĕлÿлĕхне ÿстерме, таврари хутлăхпа этем хушшинчи çыхăнăва ăса хывма пулăшĕ. çутçанталăка упрама хăнăхтарĕ.
Палăртмалла, ку çитĕнÿ «Зоренька» ача сачĕн пĕрремĕш кăна мар. ЧР Пуçлăхĕн грантне унччен те панă ăна — 2012 тата 2021 çулсенче. Грант укçи-тенкипе кашнинчех тĕллевлĕ усă кураççĕ ача садĕнче, воспитани ĕçĕнче кирлĕ оборудовани туянаççĕ, пурлăхпа техника никĕсне çирĕплетеççĕ. Çавăн пекех «Чăваш Республикинчи чи лайăх ача сачĕ», «Раççейри чи лайăх ача сачĕсем» конкурссенче темиçе хутчен те мала тухнă «Зоренька». 2024 çулта вара кунта агролаборатори уçăлнă. Ытти проектсем те ăнăçлă пурнăçланаççĕ.
«Пирĕн кашни çитĕнÿ, кашни çĕнтерÿ никĕсĕнче — ача сачĕн туслă та тăрăшуллă коллективĕн пĕр шухăшлă ĕçĕ-хĕлĕ. Эпир шкул çулне çитмен ачасене тĕрлĕ енлĕ аталантарас ĕçре хамăрăн тĕллевсене çирĕппĕн пурнăçласа пыратпăр. Тавах патшалăхăн, Чăваш Енĕн, Вăрмар округĕн руководствисене пире тĕревпе пулăшу парса, çул уçса пынăшăн», — тет «Зоренька» заведующийĕ Марина Васильевна Петрова — хăйĕн ĕçне чунтан парăннă пысăк опытлă руководитель. Вăл çак ача садĕнче 38 çула яхăн вăй хурать, çав шутра 25 çул заведующи пулса тăрăшать. Марина Васильевна хăйĕн тивĕçĕсене яваплăн пурнăçласа тата ача сачĕн ĕçне тĕрĕс йĕркелесе пыни ача сачĕн курăмлă çитĕнĕвĕсенче уççăнах палăрать. Коллектив та пысăк ăсталăхлă ĕçченсенчен тăрать. Ахальтен мар воспитанниксем ача садне ирсерен савăнăç туйăмĕпе васкаççĕ, вĕсен ашшĕсемпе амăшĕсем те кунти воспитани процесĕпе кăмăллă.
Ирина ДАНИЛОВА
