Раççей Федерацийĕн Правительствин Председателĕн Çумĕ Марат Хуснуллин Чăваш Республикин Пуçлăхĕпе Олег Николаевпа ĕçлĕ тĕлпулу ирттернĕ, унта регионăн социаллă пурнăçпа экономика аталанăвĕн ыйтăвĕсене сÿтсе явнă.
«Чăваш Республикинче граждансене пурăнмалли условисене лайăхлатма пулăшакан комплекслă ĕç хастар пурнăçланать. 2030 çул тĕлне «Пурнăç инфратытăмĕ» нацпроект шайĕнче 790 пин ытла çын /е регионти халăхăн 67 проценчĕ\ пурăнакан 19 ял-хулара пурăнмалли хутлăх пахалăхне 30% ÿстерме палăртнă. Территорисене комплекслă аталантармалли 7 проекта пурнăçлама тытăннă. Пурĕ 83 га лаптăклă çакăн пек 10 территорие палăртнă. Çавăн пекех регионта пурăнмалли çурт-йĕр хута ярассипе те пысăк кăтартусем пур. Кăçал çулталăк пуçланнăранпа 510 пин тăваткал метр хута янă, ку вăл пĕлтĕрхинчен 13% нумайрах. Ĕçĕн хăвăртлăхне чакармалла мар», – тесе каланă Марат Хуснуллин.
Регионта бюджет кредичĕсен шучĕпе инфраструктура проекчĕсене пурнăçа кĕртессипе пысăк ĕç пынине палăртнă Вице-премьер. Регионсен аталанăвĕ енĕпе ĕçлекен Правительство комиссийĕн президиумĕн ларăвĕнче халăха таса шывпа тивĕçтермелли объектсене юсаса çĕнетме 2,44 млрд тенкĕлĕх казначействăн инфратытăм кредитне илме Чăваш Республикин заявкине ырланă. Коммуналлă инфратытăма çĕнетесси регионта тата программăсен шайĕнче те ăнăçлă пурнăçланса пырать. Çав шутра федераци бюджетĕнчен финанс пулăшăвĕ панипе 31,7 çухрăм инженер сечĕсем хута янă.
Уçă калаçу вăхăтĕнче ертÿçĕсем 2030 çулччен çул-йĕр ĕçĕ-хĕлĕн планне пурнăçласси, çав шутра М-7 «Волга» автоçула юсаса çĕнетесси, сывлăх сыхлавĕн объекчĕсене хута ярасси пирки те сăмах хускатнă.
«Республикăшăн пысăк пĕлтерĕшлĕ анлă проектсене пурнăçлама пирĕнпе пĕрле тачă çыхăнса ĕçленĕшĕн Марат Шакирзяновича тав тăватăп. Вĕсене кашнине çывăх вăхăтрах пурнăçа кĕртессипе çыхăннă тапхăрсем пирки тĕплĕ килĕшÿ тăватпăр. Тĕслĕхрен, эпир Раççей Президенчĕ Владимир Владимирович Путин ырланă проекта — Республикăри клиника больницин çĕнĕ комплексне тăвассине сÿтсе яврăмăр. Вăл Чăваш Енре пурăнакансене пахалăхлă медицина пулăшăвĕпе тивĕçтерме май парĕ. Çул-йĕр хуçалăхне аталантарас сферăра çулсем тăвас ыйтусене пăхса тухнă. Шупашкар хули çывăхĕнчи М-7 автотрассăна юсаса çĕнетмелли проектпа строительство тата монтаж ĕçĕсене хăвăртрах пуçлама килĕшÿ тăватпăр. Президент хушăвĕпе аэропорт перронне юсассипе вара ĕçсем пуçланнă та ĕнтĕ», – тенĕ Чăваш Республикин Пуçлăхĕ Олег Николаев.
Регионта обществăлла транспорта модернизацилес ĕç те пырать. Федераци пулăшăвĕн мерисемпе усă курса 2023-2024 çулсенче çĕнĕ 47 автобуспа 40 троллейбуса çул çине кăларнă.
ЧР ПА пресс-служби
