Кĕнерникун, сентябрĕн 11-мĕшĕнче, ЧР Пуçлăхĕ Олег Николаев пуçарса янă «Сывă пурнăç патне — утăм» проект пирĕн районта хăйĕн тивĕçне вĕçлерĕ — Энĕшпуç ял тăрăхĕн çыннисене йышăнчĕ. Энĕшпуç станцийĕн, Энĕшпуç, Атайкасси, Хуруй, Пĕчĕк Енккасси, Аслă Чак, Атнаш ялĕсен çыннисем хăйсен сывлăхне уçă сывлăшра тĕрĕслеме пултарчĕç ку хутĕнче. Энĕшпуçĕнчи амбулатори ĕçченĕсем — Зоя Зиноновна Изосимова тата Наталия Анатольевна Сидорова медицина специалисчĕсем килессе малтанах тĕрлĕ майпа пĕлтерсе хунă халăха: телефонпа шăнкăравласа, ялсен мессенджерти чачĕ, почтальонсем урлă, килсем тăрăх çÿресе. 6 тухтăр, 2 лаборант, медицина сестрисем çынсене тÿрĕ кăмăлпа йышăнчĕç, консультацисем пачĕç.
Çак кун Энĕшпуçĕнче «Сывлăх патне — утăм» проекта» 100 ытла çын хутшăнчĕ, ытларах аслă ÿсĕмрисем. Хăйсен сывлăхĕшĕн тăрăшакансем яваплăха туйса хутшăнчĕç çак пĕлтерĕшлĕ мероприятие.
Эвелина МИХАЙЛОВА
