Чăваш Енре хутса ăшăтмалли тапхăр старт илнĕ. Социаллă сфера объекчĕсене сентябрĕн 26-мĕшĕнче ăшă пама тытăннă. ЧР Правительство Çуртĕнче эрнесерен иртекен планеркăра ЧР строительство, архитектура тата пурăнмалли çурт-йĕрпе коммуналлă хуçалăх министрĕн заместителĕ Михаил Михайлов пĕлтернĕ тăрăх, республикăри 2254 объектран 907-шне ăшăпа тивĕçтернĕ, ку вăл 41%.
Хутса ăшăтмалли тапхăра пуçлассипе Вăрмар округĕ лидер пулса тăнă. Кунта мĕнпур социаллă учрежденине ăшă панă. Çавăн пекех Пăрачкав, Елчĕк округĕсем, Шупашкар хули пысăк кăтартусемпе палăрнă. Кунта объектсен 80%-не ăшăпа тивĕçтернĕ. Етĕрне, Комсомольски, Патăрьел округĕсенче процеса 70% вĕçленĕ. Улатăр, Элĕк, Куславкка, Красноармейски, Сĕнтĕрвăрри, Шупашкар, Шăмăршă, Çĕмĕрле округĕсенче вара социаллă объектсене ăшă парас ĕçе пуçлайман-ха.
Палăртмалла, нумай хваттерлĕ çуртсене урамри сывлăш температури талăкра вăтамран Ç8 градусран сивĕрех тăрать пулсан 6-мĕш кунне ăшă пама тытăнаççĕ. Температура ку шай таранах çитеймен пулин те хăш-пĕр муниципалитетсем — Вăрмар, Вăрнар, Йĕпреç, Етĕрне, Елчĕк округĕсем тата Шупашкар хули — пурăнмалли çуртсене ăшăтма пуçланă та.
