Пирĕн районти хуçалăхсенче темĕн тĕрлĕ культура та çитĕнтереççĕ. Куккуруса вара районĕпе те «Иванов В.А.» хресчен-фермер хуçалăхĕнче кăна ÿстереççĕ хальхи вăхăтра. Кăçал унăн тухăçĕ уйрăмах савăнтарать, аван пулса çитнĕ. Шăпах куккурус выраççĕ халĕ хуçалăхра кашни уяр кун, 181 гектар çинче çитĕнтернĕ культурăран силос хатĕрлеççĕ. Уйра çимĕç пуçтармалли ятарлă комбайн пысăк хăвăртлăхпа тата хăватлăхпа ĕçлет, куккуруса çăмăллăн вырса пырать те тÿрех тураса вĕтетнĕскере çумăн пыракан трактор е КамАЗ кузовĕ çине пушатса пырать /сăн ÿкерчĕк çинче\. Комбайна Александр Васильев механизатор тĕрĕс-тĕкел ĕçлеттерет. Умлă-хыçлă виçĕ техника вĕтетнĕ çимĕçе уйран фермăна турттарса тăраççĕ. Яланхиллех руль умĕнче — хуçалăхăн шанчăклă ĕçченĕсем — Александр Артемьев, Александр Васильев, Яков Федоров. Пĕр техники тулса çитсе фермăна силос траншеи патне васканă хушăра тепĕр транспорчĕ ăна туххăмрах улăштарса пырать. Траншейăри силоса Василий Петров «Кировец» тракторпа калла-малла çÿресе пусарса тăрать /сăн ÿкерчĕк çинче/. Силоса йĕркеллĕ упрантăр тесессĕн лайăххăн пусармалла.
Хĕллехи вăхăтра силос выльăх-чĕрлĕхшĕн çав тери усăллă апат. Нумай вăхăт хушши лайăх упрантăр тесе ăна тĕрĕс хатĕрлемелле, вара унри витаминсемпе тутлăхлă япаласем сыхланса юлаççĕ. Хуçалăхра пĕтĕмпе 7 пысăк траншея. Вĕсенчен виççĕшне шăпах силоспа тултармалла.
Фермăра паянхи кун пĕтĕмĕшле мăйракаллă шултра выльăх йышĕ — 637 пуç, çак шутра сăвакан ĕнесем — 263. Пурне те вĕсене пахалăхлă апатлантармалла, ăнăçлăн хĕл каçармалла. Хуçалăхра ĕç сыхлавĕн нормативĕсене çирĕп пăхăнса ĕçлеççĕ.
Пур ĕçре те ăнăçу сунатпăр хуçалăх ертÿçине Владимир Иванова, кунта тăрăшакансене.
