Ярука урамĕ, ярт урам,
Тăршшĕпеле кил-çурчĕсем.
Сайпулла, Симентей — палăртам,
Юнашарах, ав, тăкăрлăксем.
Астăвасса, ÿсетчĕç йывăçсем:
Хурăнсем, йăмрасем, хурами,
Çĕмĕрчĕ, чиесем, сиреньсем —
Çуркунне пулса ытарайми.
Çав асамлă аслă урамра
Килнĕ ача çут тĕнчене.
Ÿссе çитĕннĕ. Халь — шутра,
Тĕлĕнтерет ĕçпе çынсене.
Ту вĕçĕнче вĕсен йăхĕ.
Куçса килнĕ, теç, Вăрмартан.
Вăл ялта, пĕлме, Кăтра йăхĕ —
Çав ятпа çÿренĕ авалтан.
Иртнĕ ĕмĕрĕн пуçĕнче
Шкул уçаççĕ анат енче.
Çавăнпа урам курăмлăччĕ,
Çÿренĕ шкула хăй вăхчинче.
Хыççăн вĕренет Канашра,
Ашшĕн ĕç-хĕлне суйланă.
Йăх-тĕп ялта ĕнтĕ шутра —
Вĕрентекен пулса тăнă.
Пурнăçĕнче веçех аванччĕ...
Ах, кĕтмен инкек алхаснă.
Ытла çамрăк, вунçиччĕреччĕ,
Çапах вăрçа тухса кайнă.
Ялан алăра пулемет,
Унта хăюллăн çапăçать.
Тăшман та хаяр, тĕлĕрмест —
Çапăçура вăл аманать.
Паллă, суранне сиплеме
Госпитале ăна яраççĕ...
«Сиплев ĕçне алла илме» -
Унта шухăшсем çуралаççĕ.
Берлина çити хăваланă
Тăшмана Эçпепе каччи.
Çĕнтерÿпе киле таврăннă,
Ĕмĕчĕсем асрах ял ачин.
Ăс пухни сая каймасть,
Чаплă хирург пулса тăрать.
Врач-травматолог, ортопед,
Хисепĕ пысăк. Савăнтарать.
Тĕрлĕ вырăнта ĕçленĕ:
Вăрнарта, Ленинградра та.
Килсе Шупашкарта тĕпленнĕ,
Чăвашсене сиплет унта.
Чун-кăмăлĕ туртнă ĕнтĕ
Чăвашалла, хамăр ене.
Аллă пилĕк çул — нумай питĕ
Ĕçре, пăхмасть кунне-çĕрне.
Халĕ чăннипех мухтанатпăр!
Вунпиллĕкмĕш кунĕ, юпа уйăхĕ.
Пĕр ĕмĕр утнă. Тата сунатпăр
Çулсем. Пултăр çирĕп сывлăхĕ.
Сорокин Михаил Григорьевич,
Пĕчĕк ялăн чаплă çынни,
Ачаранах ăс-халпа çивĕч,
Паян та юнашар хăнăхни.
Вĕренекенсем, чирлисем
Халь те тухтăр патне утаççĕ.
Çитнĕ таран хал, вăйĕсем
Пулăшать — çапла калаççĕ.
Наградисене пăхса тухар —
Вĕсенче хуравсем упранаççĕ.
Сумлă ят: «Хисеплĕ тухтăр»,
Тĕпчев ĕçĕсем çырнă, теççĕ.
Вырăсла çырам-ха. Ордена:
Отечественной войны второй степени,
Октябрьской революции, Дружбы народов,
Трудового Красного Знамени.
Медалĕсем нумай, Тав хучĕсем...
Хамăр ентеш, хĕпĕртетпĕр.
Ĕçне тăсаççĕ тăванĕсем —
Йăхра тухтăр чылай, пĕлетпĕр.
Хушас килет кунта çавна:
«Ялăн çеç мар, районăн чапĕ
Тата чăвашăн. Мухтав ăна.
Аллисем ылтăн. Тивĕç — хисепе!»
