Вăрмарти Г.Е.Егоров ячĕллĕ вăтам шкулта «Агроинженери» направленипе агротехника класĕ йĕркеленĕ. Пулас специалистсене теори тата практика тĕлĕшĕнчен хатĕрлеме класа çĕнĕ йышши оборудованипе тивĕçтернĕ.
Шкул ачисем хальхи йышши оборудованипе усă курма вĕренĕç: интерактивлă комплекс, 3D-принтер тата 3D-сканер, электронлă вĕрентÿ ресурсĕсем, контрольпе виçев инструменчĕсем, вĕрентÿ квадрокоптерĕн конструкторĕ. Оборудование «Иванов В.А.» хресчен-фермер хуçалăхĕн пуçлăхĕ Владимир Иванов туяннă. ЧР Ял хуçалăх министерствин пресс-службинчен пĕлтернĕ тăрăх, тÿснĕ тăкаксен 90 процентне ăна компенсацилеççĕ.
Агроинженери енĕпе кăçалхи вĕренÿ çулĕнче 40 ача пĕлÿ илĕ. Пĕтĕмĕшле республикăра кăçал 7 шкулта агротехнологи класĕсем уçăлĕç. Проект «Апат-çимĕç хăрушсăрлăхĕн технологи тивĕçтерĕвĕ» наци проекчĕн «Агропромышленноç комплексне — кадрсем» федераллă программи шайĕнче пурнăçланать.
Эвелина МИХАЙЛОВА хатĕрленĕ
