Г.Е. Егоров ячĕллĕ Вăрмарти пĕтĕмĕшле пĕлÿ паракан вăтам шкулти 2 «Д» класра ятарлă çар операцийĕн участникĕпе — çак класра вĕренекен Златослава Федоровăн ашшĕпе Сергей Федоровпа тĕлпулу иртрĕ.
Сергей Владимирович Федоров — Лăпкă тинĕс флочĕн Курскри Жуков ячĕллĕ 155-мĕш уйрăм гварди бригадин гварди матросĕ. Тĕлпулу вăхăтĕнче вăл хăйĕн пурнăçĕпе ĕçĕ-хĕлĕ, хăйĕн бригадин пурнăçĕ çинчен каласа пачĕ, ачасене кăсăклантаракан ыйтусем çине хуравларĕ.
2 «Д» класра вĕренекенсем хăйсен класс руководителĕпе Е.Г. Николаевăпа тата ашшĕ-амăшĕсемпе пĕрле çар служби пыракан вырăна таврăнма хатĕрленекен Сергей Владимировичăн бригадине гуманитари пулăшăвĕ кÿрес терĕç. Ачасем салтаксем патне çырусем çырчĕç, вĕсене валли ÿкерчĕксем хатĕрлерĕç, «Чебурашка» талисман — ăнăçупа ырăлăх символĕ — ăсталарĕç, çавăн пекех пылак парнесем парса ячĕç.
СВОра пирĕн çĕршывăмăра хÿтĕлекен салтаксене çирĕп сывлăх, çĕкленÿллĕ кăмăл-туйăм, ăнăçу, килĕсене хăвăртрах Çĕнтерÿпе таврăнма сунатпăр!
Елена НИКОЛАЕВА, 2 «Д» класс руководителĕ
