Халăхсен пĕрлĕхĕн кунĕнче Мускавра «Раççей наци центрĕнче» Пĕтĕм Раççейри «Раççейĕн хальхи музыка картти» фестивалĕн гала-концерчĕ иртĕ.
Ку проект çĕршыври композиторсене пĕрлештерет. Пĕр каçра куракансем пур регионăн музыка культурипе паллашма пултарĕç. Кĕвĕ хайлавĕсене Юрий Башмет ертсе пыракан «Çĕнĕ Раççей» патшалăх симфони оркестрĕ тата Людмила Зыкина ячĕллĕ «Раççей» вырăс халăх ансамблĕ шăрантарĕç. Çавăн пекех хор тата ташă ушкăнĕсем хутшăнĕç. Ятарлă хăнасем — Шаман тата Татьяна Куртукова. Тĕрлĕ халăхăн кĕвĕ инструменчĕсем концерта тата пуянлатĕç. «Раççейĕн хальхи музыка картти» проект Чăваш Енре пуçланнă. Июнь уйăхĕн 24-мĕшĕнче Дмитрий Тетель композиторăн чăваш халăх юррисене /«Ташши-ташши», «Вĕç-вĕç, куккук», «Алран кайми»/ тĕпе хурса хатĕрленĕ увертюрине лартнă. Людмила Зыкина ячĕллĕ ансамбль ăна Хĕрлĕ тÿремре Раççейĕн тĕрленĕ карттин музейĕ умĕнче шăрантарнă.
