Вăрмарти «Колосок» ача садĕнчи «Ромашка» аслă ушкăн воспитанникĕсем педагогсемпе вĕренекенсен пултарулăхĕн регионсем хушшинчи «Хавхалану» фестиваль-конкурсĕн активлă участникĕсем пулса тăнă. Мероприятие аслă чăваш педагогĕн Иван Яковлевич Яковлевăн сумлă ĕçне тивĕçлĕн тăсаканне, ученый-педагога, этнопедагогика никĕслевçине Геннадий Никандрович Волкова халалланă. «Колосок» воспитанникĕсем конкурсра «Инсценировка» номинацире хутшăннă. Ачасем Геннадий Волковăн «Йăваш чăвашпа усламçă» ăса вĕрентекен юмахне хаваспах, тулли кăмăлпа лартса парса фестиваль-конкурсăн призерĕсем пулса тăнă.
Республика шайĕнче иртнĕ мероприятие хутшăнни ачасене çĕннине пĕлме, тăван тăрăха, тăван чĕлхене, культурăна юратнине палăртма, пултарулăх енчен аталанма май пачĕ. Конкурс ачасемшĕн, вĕсен ашшĕ-амăшĕсемшĕн те чăн-чăн хавхалану çăлкуçĕ пулса тăчĕ. Воспитательсемпе пĕрле ашшĕ-амăшĕсем те активлă хутшăнчĕç ачасене çак конкурса хатĕрлеме. Малашне те çитĕнÿсем тумалла пултăр, ачасем пултарулăхра палăрни — пирĕншĕн пуриншĕн те пысăк савăнăç!
Лира КОВАЛЕВСКАЯ, «Колосок» ача сачĕн музыка руководителĕ
