Шупашкарта СССР халăх артистки Вера Кузьмина ячĕллĕ наци театрĕсен регионсем хушшинчи «Чĕкеç» II-мĕш фестиваль уçăлнă. Кăçал унта Калмăк, Алтай, Якути, Мари Эл, Пермь тата Чăваш Ен театрĕсем хутшăнаççĕ. Вĕсем хăйсен чи лайăх спектаклĕсене кăтартĕç, тĕп тема — «Хĕрарăм — искусствăра».
Чăваш Республикин Пуçлăхĕ Олег Николаев фестивалĕн пысăк пĕлтерĕшне палăртнă. «Чĕкеç» — культурăри ахаль пулăм мар, вăл нацисен театр искусствине аталантармалли тата регионсем хушшинчи çыхăнăва çирĕплетмелли хăватлă импульс», — тенĕ вăл.
Фестивале К.В. Иванов ячĕллĕ Чăваш патшалăх академи драма театрĕн «Хуркайăк çулĕ» спектаклĕ уçнă. Пурĕ фестиваль шайĕнче 6 спектакль лартса парĕç. Жюри членĕсем çĕнтерÿçĕсене 7 номинацинче палăртĕç.
