Ноябрĕн 26-мĕшĕнче Чăваш Республикинче Чăваш тĕррин кунне паллă тăваççĕ. Çак уяв умĕн шкул çулне çитмен ачасене — Чупайĕнчи ача сачĕн воспитанникĕсене — «Чăваш тĕррин вăрттăнлăхĕ» пултарулăх мастерскойне йыхравларăмăр.
Презентаци урлă ачасем уяв историйĕпе паллашрĕç, чăваш тĕрринчи кашни эреш, кашни тĕс мĕне пĕлтернине ăса хыврĕç. Вĕсем хут çинче ÿкернĕ чăваш тĕррин эрешĕсене тĕрлĕ тĕспе сăрласа илемлетрĕç, чăваш халăхĕн капăр тумĕсем тата чăваш тĕрри çинчен çырнă кĕнекесене уçса пăхрĕç. Чăваш халăх тĕрри илемлĕ кăна мар, унта пирĕн мăн асаттемĕрсен ăс-хакăлĕ те сăнарланать, унăн тĕлĕнмелле тĕнчипе паллашни ачасен чунĕсенче тарăн йĕр хăварчĕ.
Сăмаха май, Чупайĕнчи ача сачĕн воспитанникĕсем Чăваш тĕррин кунне халалланă «Чăваш тĕррин асамлăхĕ» онлайн-фотоакцине те тулли кăмăлпа хутшăнаççĕ. Акцие Чăваш Республикинчи ачасемпе çамрăксен библиотеки йĕркеленĕ.
Вера ЛЕОНТЬЕВА, Чупайĕнчи библиотека заведующийĕ
