Чылайăшĕ йывăç чÿречесемпе алăксене пластикрен тунисемпе улăштарчĕ. Пурте пластик çине куçса пĕтрĕç темелле, апла пулин те ку енĕпе çыхăннă производство малаллах аталанать, спрос та яланах пур.
«Паянхи кун эпир çынсен саккасĕсем тăрăх чÿречесемпе алăксем, балкон блокĕсем, лоджисем, тĕрлĕ тĕспе тĕрлĕ конструкцисем туса паратпăр. Клиентсем патне килсе хамăр виçсе каятпăр, хатĕр продукцине вырнаçтарса лартса хăваратпăр», - тет Вăрмар тăрăхĕнче пластик чÿречесен производствине чылай çул тытса пыракан Сергей Анатольевич Петров /ÿкерчĕк çинче/ предприниматель.
Сергей Анатольевич Пинер ялĕнче çуралса ÿснĕ. Шкулта вĕреннĕ чухнех математика енĕпе вăйлă пулнă, кăткăс задачăсене шутлама юратнă. Ÿссе çитсен те, халĕ те пуçа ĕçлеттерме пĕлни пурнăçра пулăшса пырать ăна. Предпринимательлĕх ĕçне — пластикрен продукци туса хатĕрлекен производствăна вăл районта 2008 çулта пуçарса янă. Унччен маларах тăванĕсемпе, юлташĕсемпе Мускавра «Уютные окна» фирмăра пластик чÿречесем тунă çĕрте тăрăшнă, ĕç майне пĕлсе çитнĕ, çителĕклĕ опыт пухнă. Шутласан, шутласан çак ĕçе тăван тăрăхра хăй пуçарса яма шут тытнă. Пĕрре те йăнăшман. Паянхи кун Вăрмар тăрăхĕсĕр пуçне Чăваш Ен, Раççей шайĕнчи клиентсемпе çыхăнса ĕçлет.
Сергейăн ашшĕ Анатолий Николаевич Петров та пĕрле пулăшса пырать, ывăлĕ Сергей те студент пулнă май çуллахи каникулта тăрăшать производствăра. Официаллă майпа 3 çын ĕçлет цехра. Вĕсенчен пĕри Вячеслав Ильич Егоров /ÿкерчĕк çинче/. Çĕнĕ Кавал ялĕнчен вăл хăй. 8 çул ĕçлет Сергей Анатольевич патĕнче, опытлă специалист.
Бизнеса аталантарса пырса предприниматель автомашинăсем çумалли салон та уçнă 4 çул каялла, паянхи кун ăна та ăнăçлă ĕçлеттерет.
Пластик чÿречесем е алăксем саккас парса лартас тетĕр пулсан Вăрмар поселокĕнчи Киров урамĕнче 32-мĕш çуртри 2-мĕш корпурсри офиса килме пултаратăр. Тĕплĕнрех ыйтса пĕлмелли телефон номерĕ: 8-960-306-97-96.
Эвелина МИХАЙЛОВА
