Ноябрĕн 12-мĕшĕнче паллă тăвакан уяв «Кăсăя кунĕ» Раççейре темиçе çул каяллах çуралнă.
Йăлана кĕнĕ тăрăх, шăпах çак кун сырăшсене юсаса çакнă, хĕл каçакан кайăксем валли апат-çимĕç хатĕрленĕ. Лайăх çитернă кăсăя ырăлăха тавăрĕ, кил-çурта сиенрен хăтарĕ тесе шутланă. Карăкçырми ялĕнчи шкул çулне çитмен ачасен ушкăнĕнче кайăксен пурнăçĕ, вĕсен йăлисем, кайăксем çутçанталăкшăн мĕнле пĕлтерĕшлĕ пулни çинчен вĕрентÿллĕ калаçу иртрĕ. Ачасем сăвăсем, кĕске калавсем итлерĕç, пластилинран кăсăя йăваларĕç, вăйăсем те вылярĕç. Уçăлма тухсан вара ашшĕ-амăшĕсемпе пĕрле хатĕрленĕ сырăшсене йывăç тураттисем çине çакрĕç. Çакăн пек мероприятисем ачасенче ырă кăмăл-туйăм çуратаççĕ кăна мар, вĕсене тимлĕ, яваплă пулма, çутçанталăка хисеплеме вĕрентеççĕ.
Надежда Александрова, Ирина Львова, воспитательсем.
